Mae Duw gyda ni!

Iʼr arweinydd cerdd. Cân i leisiau merched ifanc, gan feibion Cora.

1Mae Duw yn ein cadw niʼn saff ac yn rhoi nerth i ni.

Mae e bob amser yna iʼn helpu pan mae trafferthion.

2Felly fydd gynnon ni ddim ofn

hyd yn oed petaiʼr ddaear yn ysgwyd,

aʼr mynyddoedd yn syrthio i ganol y môr

3gydaʼi donnau gwyllt yn troelli ac yn ewynnu.

Maeʼr mynyddoedd yn crynu wrth iddo ymchwyddo.

Saib

4Y mae afon! Mae ei chamlesi yn gwneud dinas Duw yn llawen.

Ie, y ddinas lle maeʼr Duw Goruchaf yn byw.

5Mae Duw yn ei chanol – fydd hi byth yn syrthio!

Bydd Duw yn dod iʼw helpu yn y bore bach.

6Mae gwledydd mewn cyffro, a theyrnasoedd yn syrthio.

Pan mae Duw yn taranu maeʼr ddaear yn toddi.

7Maeʼr ARGLWYDD hollbwerus gyda ni!

Mae Duw Jacob yn gaer ddiogel i ni!

Saib

8Dewch i weld beth maeʼr ARGLWYDD wediʼi wneud;

y difrod rhyfeddol mae wediʼi ddwyn ar y ddaear!

9Maeʼn dod â rhyfeloedd i ben drwyʼr ddaear gyfan;

maeʼn maluʼr bwa ac yn torriʼr waywffon,

ac yn llosgi cerbydau rhyfel mewn tân.

10“Stopiwch! Maeʼn bryd i chi ddeall mai Duw ydw i!

Dw iʼn llawer uwch naʼr cenhedloedd;

dw iʼn llawer uwch naʼr ddaear gyfan.”

11Maeʼr ARGLWYDD hollbwerus gyda ni!

Mae Duw Jacob yn gaer ddiogel i ni!

Saib