Mae Myfyrdodau Dyddiol Cymdeithas y Beibl yn dilyn cynllun darllen Beibl M'Cheyne, a ddyluniwyd ar gyfer y rhai sydd am ddarllen y Beibl cyfan mewn blwyddyn. Mae pob myfyrdod yn canolbwyntio ar un o'i bedair pennod ddyddiol. Darllenwch rhain yn Gymraeg.
Arglwydd, paratoa fi i dderbyn dy air. Cliria fy meddwl a chynhesa fy nghalon. Sicrha fi o’th fwriadau cariadus ar fy nghyfer, a siarad â mi heddiw.
Efallai mai geiriau agoriadol y Beibl yw’r rhai enwocaf a ysgrifennwyd erioed: yn y dechrau, creodd Duw. Mae gweddill y bennod yn datblygu fel darlun o bob rhan o’r greadigaeth yn cael ei gwneud yn ofalus i gyflawni ei phwrpas ei hun. Mae yna thema sy’n rhedeg drwy’r cyfan: ‘roedd Duw yn gweld bod hyn yn dda’.
Rydym yn tynnu oddi wrth yr hanes hwn os ydym yn ei drin fel papur gwyddonol; nid yw’n fath o ddewis arall yn lle'r theori'r Glec Fawr. Yn lle, mae’n ddatganiad diwinyddol radical: y byd yw’r hyn ydyw oherwydd bod Duw cariadus wedi bwriadu iddo fod felly.
Mae’n werth cymharu hyn â straeon creu eraill o gwmpas ar y pryd. Ym mytholeg Babilonaidd, crëwyd y byd allan o wrthdaro treisgar rhwng duwiau. Gwnaethpwyd bodau dynol i fod yn gaethweision y duwiau. Rydym yn byw yn ôl y straeon rydym yn eu hadrodd. Dychmygwch y gwahaniaeth rhwng diwylliant cyfan wedi’i seilio ar y gred bod y byd wedi’i adeiladu ar lofruddiaeth a chaethwasiaeth, ac un yn seiliedig ar Genesis 1. Gwnaeth Duw'r byd allan o gariad, a bendithio’r bodau dynol a greodd.
Felly mae gan y bennod hon lawer i’w ddysgu inni. Gwnaed byd da, ac nid oes gennym hawl i’w difetha. Gwneir pobl i gael eu bendithio. Roedd Duw yn ‘gweld bod hyn yn dda’. A yw’n falch o’r hyn y mae’n ei weld heddiw? Peth ohono, ond nid y cyfan; a dyna ble mae ei bobl yn cael eu galw i dystio i ffordd well.
Duw, diolch am greu byd rhyfeddol. Diolch fod dy gariad yn dragwyddol, a dy fod yn parhau i ofalu am dy greadigaeth. Helpa fi i ofalu hefyd.
Ysgrifennwyd y myfyrdod hwn gan Mark Woods, Golygydd Cymdeithas y Beibl.
Read the Bible 
Processing...