Fy Meibl

Rhesymau i gredu ym mhŵer y Beibl

‘Yn ystod y cyfnod clo, roeddwn i'n teimlo'n weddol unig gan fy mod wedi arfer bod yn y gwaith mewn ysgol uwchradd gyda phobl o'm cwmpas i siarad â nhw. Roeddwn hefyd wedi arfer â chael mam i aros am ddau neu dri diwrnod bob wythnos i'm helpu i edrych ar ôl fy nau blentyn mabwysiedig. Mae fy mhlant ar ei hôl hi’n emosiynol ac yn academaidd oherwydd eu trawma yn y gorffennol; ychydig flynyddoedd yn ôl, euthum trwy ysgariad chwerw ac mae pethau'n dal yn anodd i mi yn y berthynas honno.

‘Roeddwn i'n ei chael hi'n heriol iawn addysgu fy mhlant gartref, gweithio gartref a gofalu am y plant ar fy mhen fy hun heb allu mynd allan i leoedd a pheidio â chael cefnogaeth fy mam na rhywun gerllaw i'm cefnogi pan oedd pethau'n achosi straen.

‘Teimlais yn ynysig iawn, ond tyfodd fy ffydd yn ystod yr amser hwn trwy bobl eraill yn nheulu Duw. Mwynheais yr amser ychwanegol a gefais gyda fy mhlant i allu siarad mwy â nhw am Dduw ac Iesu ac i edrych ar rai rhannau o'r Beibl gyda nhw. Prynais CD addoli yr ydym yn gwrando arno ac yn canu iddo yn y car a dechreuais ddarllen y Beibl gan ddefnyddio canllaw astudio blwyddyn o hyd. Dechreuais wrando hefyd ar orsaf radio Gristnogol a helpodd fi i ddeall y Beibl yn fwy.

‘Yr adnod sydd wedi atseinio gyda mi fwyaf ers y clo yw Jeremeia 9.24, sy'n dweud, “‘Myfi yw'r Arglwydd, sy'n gweithredu'n ffyddlon, yn gwneud barn a chyfiawnder ar y ddaear, ac yn ymhyfrydu yn y pethau hyn,’ medd yr Arglwydd.” Mae'r adnod hon yn dod â chysur i mi gan ei fod yn fy atgoffa bod ein Duw yn dda ac mae'n gofalu am bawb sy'n troi ato.’

Oes gennych chi stori i rannu? E-bostiwch [email protected]