Gweddi am help

Mascîl. Salm gan Dafydd, pan oedd yn yr ogof.- Gweddi.

¹Dw i'n gweiddi'n uchel ar yr ARGLWYDD;

dw i'n pledio ar i'r ARGLWYDD fy helpu.

²Dw i'n tywallt y cwbl sy'n fy mhoeni o'i flaen,

ac yn dweud wrtho am fy holl drafferthion.

³Pan dw i wedi anobeithio'n llwyr,

rwyt ti'n gwylio pa ffordd dw i'n mynd.

Maen nhw wedi cuddio magl

ar y llwybr o mlaen i.

⁴Dw i'n edrych i'r dde –

ond does neb yn cymryd sylw ohono i.

Mae dianc yn amhosib –

does neb yn poeni amdana i.

⁵Dw i'n gweiddi arnat ti, ARGLWYDD;

a dweud, “Ti ydy'r unig le saff i mi fynd,

does gen i neb arall ar dir y byw!”

⁶Gwranda arna i'n gweiddi, dw i'n teimlo mor isel.

Achub fi o afael y rhai sydd ar fy ôl;

maen nhw'n rhy gryf i mi.

⁷Gollwng fi'n rhydd o'r carchar yma,

er mwyn i mi foli dy enw di.

Bydd y rhai cyfiawn yn casglu o'm cwmpas

am dy fod ti wedi achub fy ngham.