Gweddi am help

Salm Dafydd.

¹O ARGLWYDD, gwrando ar fy ngweddi.

Gwranda arna i'n pledio am dy help di!

Ti'n Dduw ffyddlon a chyfiawn, felly, plîs ateb fi.

²Paid rhoi dy was ar brawf,

achos does neb yn ddieuog yn dy olwg di.

³Mae'r gelyn wedi dod ar fy ôl i,

ac wedi fy sathru i'r llawr.

Mae wedi gwneud i mi eistedd yn y tywyllwch

fel y rhai sydd wedi marw ers talwm.

⁴Dw i'n anobeithio,

dw i wedi fy mharlysu gan ddychryn!

⁵Ond wedyn dw i'n cofio am beth wnest ti yn y gorffennol,

ac yn myfyrio ar y cwbl wnest ti ei gyflawni.

⁶Dw i'n estyn fy nwylo allan atat ti.

Dw i fel tir sych yn hiraethu am law!

Saib

⁷Brysia! Ateb fi, ARGLWYDD!

Alla i ddim diodde dim mwy!

Paid troi i ffwrdd oddi wrtho i,

neu bydda i'n syrthio i bwll marwolaeth.

⁸Gad i mi glywed am dy gariad ffyddlon di yn y bore,

achos dw i'n dy drystio di.

Gad i mi wybod pa ffordd i fynd –

dw i'n dyheu amdanat ti!

⁹Achub fi o afael y gelyn, O ARGLWYDD;

dw i'n rhedeg atat ti am gysgod.

¹⁰Dysga fi i wneud beth wyt ti eisiau,

achos Ti ydy fy Nuw i.

Boed i dy Ysbryd hael di fy arwain

i rywle saff.

¹¹Achub fi, O ARGLWYDD, er mwyn dy enw da.

Ti'n Dduw cyfiawn, felly arwain fi allan o'r helynt yma.

¹²Rwyt ti mor ffyddlon. Delia gyda'r gelynion!

Dinistria'r rhai sy'n ymosod arna i,

achos dy was di ydw i.