Cerdd 5 – Gweddi am drugaredd

Pobl Jerwsalem yn gweddïo am drugaredd.

1ARGLWYDD, cofia beth sydd wedi digwydd i ni.

Edrycha arnon ni yn ein cywilydd!

2Maeʼn gwlad5:2 gwlad Hebraeg, “etifeddiaeth”, syʼn cyfeirio at y wlad roddodd Duw i Abraham – gw. Jeremeia 2:7; Deuteronomium 26:1. wediʼi rhoi yn nwyloʼr gelyn,

aʼn cartrefi wediʼu meddiannu gan bobl estron.

3Dŷn ni fel plant amddifad, heb dadau,

ac mae ein mamau fel gwragedd gweddwon.

4Rhaid i ni brynu dŵr iʼw yfed,

a thalu am y coed tân dŷn niʼn ei gasglu.

5Dŷn niʼn cael ein gyrru fel anifeiliaid â iau ar eu gwarrau;

wedi blinoʼn lân, ac yn cael dim gorffwys.

6Gwnaethon gytundeb gydaʼr Aifft ac Asyria,

er mwyn cael digon o fwyd i fyw.

7Roedd ein hynafiaid, syʼn farw bellach, wedi pechu;

a dŷn niʼn diodde canlyniadau eu drygioni nhw.5:7 Exodus 20:5

8Mae caethweision yn feistri arnon ni,

a does neb yn galluʼn hachub ni oʼu gafael nhw.

9Dŷn niʼn gorfod mentroʼn bywydau i nôl bwyd,

am fod lladron arfog yn cuddio yng nghefn gwlad.

10Mae newyn yn achosi i ni ddiodde o dwymyn;

mae ein croen yn teimloʼn boeth fel ffwrn.

11Maeʼr gwragedd yn cael eu treisio yn Seion,

aʼr merched ifanc yn nhrefi Jwda.

12Maeʼr gelyn wedi crogi ein harweinwyr,

a cham-drin y rhai hynaf ohonynt.

13Maeʼr dynion ifanc yn cael eu gorfodi i weithioʼr maen melin,

aʼr bechgyn yn baglu wrth gario llwyth o goed.

14Dydyʼr arweinwyr hŷn ddim yn cyfarfod wrth giât y ddinas,

ac maeʼr bechgyn ifanc wedi stopio canu eu cerddoriaeth.

15Mae pob llawenydd wedi diflannu;

yn lle dawnsio dŷn niʼn galaru.

16Maeʼr dathlu wedi dod i ben.

Gwae ni, dŷn ni wedi pechu!

17Dŷn niʼn teimloʼn sâl, ac wedi colli pob hyder;

maeʼr sbarc wedi diflannu oʼn llygaid,

18am fod Mynydd Seion yn gorwedd yn wag;

dim ond siacaliaid sydd ynoʼn prowla.

19Ond rwyt ti, ARGLWYDD, yn teyrnasu am byth;

mae dy orsedd yn para ar hyd y cenedlaethau.

20Pam wyt ti wedi anghofio amdanon ni?

Pam wyt ti wedi troi cefn arnon ni mor hir?

21Tyn niʼn ôl atat dy hun, ARGLWYDD, i ni droi nôl.

Gwna ni eto fel roedden ni ers talwm.

22Neu wyt ti wediʼn gwrthod niʼn llwyr?

Wyt ti wedi digioʼn lân gyda ni?