Salusyans

1Powl, abostol Krist Yesu dre volonjedh Duw,

Dhe'n syns usi yn Efesus1:1 War-lergh re a'n dornskrifow nyns usi omma an geryow usi yn Efesus. yw lel yn Krist Yesu:

2Gras dhywgh hwi ha kres dhiworth Duw agan Tas ha'n Arloedh Yesu Krist.

Bennathow Spyrysel yn Krist

3Benniges re bo Duw ha Tas agan Arloedh Yesu Krist, neb re'gan bennigas gans pub bennath spyrysel y'n tylleryow nevek yn Krist, 4dell y'gan dewisas ynno kyns gwrians an bys, may fen ni sans ha divlam a-dheragdho yn kerensa, 5orth agan ragdhestna dhe vos degemmerys avel mebyon dhodho ev, dre Yesu Krist, orth bodh y vrys, 6dhe wormel splannder y ras a wrontyas dhyn y'n Karadow; 7yn neb y'gan beus daspren der y woes, gevyans peghosow, war-lergh rychys y ras 8a ros dhyn yn hel, yn oll furneth ha konvedhes, 9ow ri dhyn godhvos kevrin y volonjedh, war-lergh y vodh a dhispletyas ynno 10avel towl rag keweras an termynyow, dhe guntell pup-tra war-barth yn Krist, an taklow yn nev, ha'n re y'n nor, ynno ev; 11ni ynwedh a veu dewisys, ragdhestnys war-lergh y borpos ev neb a gowlwra pup-tra orth bodh y vrys, 12may fewen ni rag gormel y splannder, ni neb o an kynsa a'n jevo govenek yn Krist; 13yn neb hwi ynwedh, ow klewes an ger a wiryonedh, aweyl agas selwyans, yn neb hwi ynwedh ow krysi, a veu selys gans an Spyrys Sans ambosys, 14neb yw ragdal agan eretons bys pan vo dasprenys an perghennogeth, dhe wormel y splannder.

Pysadow Powl

15Rakhenna, my ynwedh, ow klewes a'gas fydh y'n Arloedh Yesu, ha'n gerensa war-tu ha'n syns oll, 16ny asav grassa ragowgh, orth agas kampoella y'm pysadow, 17may rollo an Duw a'gan Arloedh Yesu Krist, an Tas a wolewder, spyrys furneth ha diskwedhyans y'n aswonnvos anodho, 18golowys dewlagas agas kolonn, may hwodhvewgh pyth yw govenek y alow, pyth yw rychys splannder y eretons y'n syns, 19ha pyth yw an braster dres eghenn a'y alloes troha ni neb a grys war-lergh oberyans krevder y nerth 20a wrug ev yn Krist, orth y dhrehevel a'n re varow, ha'y worra dhe esedha a-dhyghow dhodho y'n tylleryow nevek, 21pell a-ugh pub prynsipata ha potestas ha dominasyon ha pub hanow yw henwys, hag y'n oes ma hag y'n oesow a dheu; 22hag ev re worras pup-tra yn-dann y dreys hag a'n ros dhe vos penn war bup-tra dhe'n eglos, 23yw y gorf, an leunder anodho ev neb a lenow oll yn oll.