Mae Duw yn un: Rhufeiniaid 3.21–31 (12 Awst 2020)

Gweddi

Arglwydd, agor fy nghlustiau i glywed yr hyn sydd gennyt i’w ddweud wrthyf; agor fy nghalon i garu dy air, ac agor fy meddwl i ddeall dy wirionedd.

Darllen

1 Samuel 3 Rhufeiniaid 3 Jeremeia 41 Salm 17

Myfyrdod Dyddiol: Rhufeiniaid 3

Yn y bennod hon mae Paul yn parhau â’i ddadl bod Iddewon a Chenhedloedd ar dir gwastad. Mae Iddewon, meddai, wedi eu hymddiried â neges Duw (adnod 2) ond nid ydynt mewn cyflwr gwell na gwaeth na Chenhedloedd (adnod 9); rydym i gyd ‘dan nerth pechod’ ac yn cael ein hachub trwy ffydd yng Nghrist.

Mae angen i ni fod yn ofalus ynghylch darllen i mewn i Rhufeiniaid syniadau mwy cyfoes am ‘iachawdwriaeth trwy weithredoedd’, sy’n canolbwyntio ar y syniad y gallwn ‘ennill ein ffordd at Dduw’ trwy fyw bywydau moesol gyfiawn. Ni allwn, wrth gwrs! Nid ydym yn cael ein hachub gan unrhyw beth a gyflawnwn, ond trwy ras Duw. Ond nid dyna oedd Paul yn siarad amdano mewn gwirionedd. Pan gyfeiriodd at ‘wneud beth mae'r Gyfraith Iddewig yn ei ofyn’ (adnod 28), roedd yn golygu traddodiadau Iddewiaeth fel enwaediad a chadw’r Saboth. Roedd Paul yn dweud nad yw’r pethau hynny yn sicrhau iachawdwriaeth i Iddewon, a bod angen ffydd arnynt yn union fel Cenhedloedd er mwyn cael eu hachub (adnod 30).

I Genhedloedd heddiw, mae’r ddadl hon ar ben. Mae Cenhedloedd Cristnogol yn cymryd ffydd yn ganiataol. Ond dyna’r broblem: mae’r hyn a oedd yn chwyldroadol i ddarllenwyr Paul yn beth cyffredin i ni. Felly efallai y bydd angen i ni ddarllen Rhufeiniaid 3 yn fwy gofalus. A ydym ni fel Cristnogion wedi syrthio i’r ymdeimlad o fraint? A ydym yn tybio bod perthyn i gymuned Gristnogol yn ddigon i’n gwneud ni’n iawn gyda Duw, heb feddwl am ffydd bersonol mewn gwirionedd? A yw cadw ‘cyfraith’ yr Eglwys yr un fath i ni â brodyr a chwiorydd Iddewig Paul yn cadw Cyfraith Moses yn y ganrif gyntaf? Os felly, efallai ein bod yn methu â gwerthfawrogi bendith ryfeddol, mai ‘Duw sy'n gwneud y berthynas yn iawn’ (adnod 24). 

Gweddi

Duw, diolch am fendithion dy Eglwys, ac y gallaf fod yn rhan o gymuned gariadus a ffyddlon. Gad imi beidio byth â cholli'r ymdeimlad o ryfeddod wrth dy ras imi.