Gweddi am help

Salm Dafydd.

1O ARGLWYDD, arnat ti dw iʼn galw!

Paid diystyru fi – ti ydy fy nghraig i.

Os wnei di ddim ateb

bydda iʼn siŵr o ddisgyn iʼr bedd!

2Gwranda arna iʼn galw –

dw iʼn erfyn am drugaredd!

Dw iʼn estyn fy nwylo

at dy deml sanctaidd.

3Paid llusgo fi i ffwrdd gydaʼr rhai drwg,

y bobl hynny syʼn gwneud dim byd ond drwg.

Maen nhwʼn dweud pethau syʼn swnioʼn garedig

ond does dim byd ond malais yn y galon.

4Tala nôl iddyn nhw am wneud y fath beth!

Rho iddyn nhw beth maen nhwʼn ei haeddu!

Cosba nhw!

5Dŷn nhw ddim yn deall

y ffordd maeʼr ARGLWYDD yn gweithio.

Bydd eʼn eu bwrw nhw i lawr,

a fyddan nhw byth yn codi eto!

6Bendith ar yr ARGLWYDD!

Ydy, mae e wedi gwrando arna iʼn erfyn am drugaredd!

7Maeʼr ARGLWYDD yn rhoi nerth i mi;

mae eʼn darian iʼm hamddiffyn.

Dw iʼn ei drystio feʼn llwyr.

Daeth iʼm helpu, a dw i wrth fy modd!

Felly dw iʼn mynd i ganu mawl iddo!

8Maeʼr ARGLWYDD yn gwneud ei bobl yn gryf.

Mae e fel caer yn amddiffyn ac yn achub ei eneiniog, y brenin.

9Achub dy bobl!

Bendithia dy bobl sbesial!

Gofala amdanyn nhw fel bugail

aʼu cario yn dy freichiau bob amser!