Mae hi ar ben ar Israel!

¹Pan oedd llwyth Effraim yn siarad

roedd pawb yn crynu –

roedd pawb yn ei barchu yn Israel.

Ond buont ar fai yn addoli Baal,

a dyna oedd eu diwedd.

²Ac maen nhw'n dal i bechu!

Maen nhw wedi gwneud delwau o fetel tawdd;

eilunod cywrain wedi'u gwneud o arian –

ond dim ond gwaith llaw crefftwyr ydy'r cwbl!

Mae yna ddywediad amdanyn nhw:

“Mae'r bobl sy'n aberthu

yn cusanu teirw!”

³Byddan nhw wedi mynd fel tarth y bore,

neu'r gwlith sy'n diflannu'n gynnar;

fel us yn cael ei chwythu o'r llawr dyrnu,

neu fwg sy'n dianc drwy ffenest.

⁴“Ond fi ydy'r ARGLWYDD eich Duw,

ers i chi ddod allan o wlad yr Aifft.

Peidiwch arddel unrhyw dduw ond fi –

Fi ydy'r unig un sy'n achub!

⁵Fi wnaeth fwydo'ch pobl yn yr anialwch,

mewn tir sych, diffaith.+ -

⁶Ond wedi'u bwydo, roedden nhw'n fodlon –

mor fodlon nes iddyn nhw droi'n falch,

ac yna fy anghofio i!

⁷Felly bydda i'n rhuthro arnyn nhw fel llew,

ac yn llechian fel llewpard ar ochr y ffordd.

⁸Bydda i'n ymosod arnyn nhw

fel arth wedi colli ei chenawon;

a'u llarpio nhw fel llew,

neu anifail gwyllt yn rhwygo'i ysglyfaeth.

⁹Dw i'n mynd i dy ddinistrio di, O Israel!

Pwy sydd yna i dy helpu di?

¹⁰Ble mae dy frenin,

iddo fe dy achub di?

Ble mae'r arweinwyr yn dy drefi?

Ti ofynnodd, ‘Rho frenin a swyddogion i mi’.-

¹¹Wel, rhois frenin i ti am fy mod yn ddig,

a dw i wedi'i gipio i ffwrdd am fy mod yn fwy dig fyth!-

¹²Mae'r dyfarniad ar Effraim+ wedi'i gofnodi,

a'i gosb wedi'i gadw'n saff iddo.

¹³Bydd yn dod yn sydyn, fel poenau ar wraig sy'n cael babi;

mae'r amser wedi dod, ac mae'r plentyn dwl

yn gwrthod dod allan o'r groth, a byw.

¹⁴Ydw i'n mynd i'w hachub nhw o fyd y meirw?-

Ydw i'n mynd i'w rhyddhau o afael marwolaeth?

O farwolaeth! Ble mae dy blâu di?

O fedd! Ble mae dy ddinistr di?

Fydda i'n dangos dim trugaredd!”

Bydd Samaria'n cael ei dinistrio

¹⁵Falle ei fod yn llwyddo fel brwyn mewn cors,

ond bydd yr ARGLWYDD yn dod â gwynt poeth y dwyrain

i fyny o gyfeiriad yr anialwch.

Bydd y dŵr yn sychu, a'r ffynhonnau'n diflannu,

a'r bwydydd yn y stordai yn cael eu difetha.

¹⁶Bydd Samaria+ yn cael ei galw i gyfri

am wrthryfela yn erbyn ei Duw.

Bydd y bobl yn cael eu lladd yn y rhyfel,

plant bach yn cael eu curo i farwolaeth,

a'r gwragedd beichiog yn cael eu rhwygo'n agored.-