Torriʼr Goeden Gedrwydd

1Roedd hi un deg un mlynedd ar ôl i ni gael ein cymryd yn gaeth i Babilon, ar ddiwrnod cyntaʼr trydydd mis.31:1 diwrnod cyntaf y trydydd mis Mehefin 21, 587 CC maeʼn debyg. A dyma fiʼn cael y neges yma gan yr ARGLWYDD: 2“Ddyn, dywed wrth y Pharo,31:2 Pharo Apries, oedd hefyd yn cael ei adnabod fel Hoffra, oedd yn frenin yr Aifft o 589 i 570 CC. brenin yr Aifft, aʼi bobl i gyd:

‘Oes rhywbeth syʼn cymharu â dy fawredd di?

3Roedd Asyria fel coeden gedrwydd yn Libanus,

aʼi changhennau hardd fel cysgod y goedwig.

Roedd yn aruthrol dal, aʼi brigau uchaf yn y cymylau.

4Y dŵr oedd yn gwneud iddi dyfu,

aʼr ffynhonnau dwfn yn ei gwneud yn dal.

Roedd nentydd yn llifo oʼi chwmpas;

a sianeli dŵr yn dyfrioʼr coed i gyd.

5Ond roedd y goeden hon yn dalach

naʼr coed oʼi chwmpas i gyd.

Canghennau mawr a brigau hir,

aʼi gwreiddiauʼn lledu at y dŵr.

6Roedd yr adar i gyd yn nythu yn ei brigau,

aʼr anifeiliaid gwyllt yn geni rhai bach dan ei changhennau.

Roedd y gwledydd mawr i gyd yn byw dan ei chysgod.

7Roedd yn rhyfeddol o hardd gydaʼi changhennau hir,

aʼi gwreiddiauʼn ymestyn yn ddwfn at ddigonedd o ddŵr.

8Doedd coed cedrwydd eraill gardd Duw ddim yn cystadlu â hi.

Doedd canghennauʼr coed pinwydd ddim byd tebyg;

aʼr coed planwydd yn ddim oʼu cymharu â hi.

Doedd dim un o goed gardd Duw mor hardd â hon!

9Fi wnaeth hiʼn hardd gydaʼi holl ganghennau.

Roedd coed Eden i gyd, gardd Duw, yn genfigennus ohoni.

10“‘Felly, dyma maeʼr ARGLWYDD, y Meistr, yn ei ddweud: Am ei bod hi mor falch ohoni ei hun, mor aruthrol dal gydaʼi brigau uchaf yn y cymylau, 11rhois hi yn nwylo arweinydd y cenhedloedd, iʼw chosbi am ei drygioni. Dw i wediʼi thaflu hi i ffwrdd. 12Mae byddin estron y wlad fwya creulon wediʼi thorri i lawr aʼi gadael i orwedd ar y mynyddoedd. Mae ei changhennauʼn gorwedd ar chwâl yn y dyffrynnoedd aʼr ceunentydd. Mae pawb oedd yn cysgodi oddi tani wedi ffoi pan gafodd ei thaflu i ffwrdd. 13Maeʼr adar i gyd yn clwydo ar ei boncyff marw, aʼr anifeiliaid gwyllt yn cerdded dros ei changhennau.

14“‘Digwyddodd hyn i stopio i unrhyw goeden arall dyfu mor dal nes bod ei brigau uchaf yn y cymylau. Byddan nhw i gyd, fel pobl feidrol, yn marw yn nyfnder y ddaear. Byddan nhwʼn ymuno gyda phawb arall sydd yn y Pwll.

15“‘Dyma maeʼr ARGLWYDD, y Meistr, yn ei ddweud: Pan aeth Asyria i lawr iʼr bedd, roedd y dyfnder yn galaru amdani. Dyma fiʼn dal yr afonydd yn ôl oddi wrthi. Gwisgais Libanus mewn du, a gwneud iʼr coed eraill i gyd wywo. 16Roedd y gwledydd i gyd yn crynu pan glywon nhw amdaniʼn syrthio, pan wnes i ei thaflu i lawr i fyd y meirw gyda phawb arall sydd yn y Pwll. Yn y byd tanddaearol cafodd coed Eden i gyd aʼr gorau o goed Libanus, pob un oedd wedi cael digon o ddŵr, eu bodloni. 17Roedd ei chefnogwyr i gyd (y gwledydd oedd wedi byw dan ei chysgod) wedi mynd i lawr i fyd y meirw gyda hi, i ymuno gyda phawb arall oedd wediʼu lladd âʼr cleddyf.

18“‘Pa un o goed Eden sydd unrhyw beth tebyg i ti? Ond byddi dithauʼn cael dy fwrw i lawr i ddyfnder y ddaear gyda choed Eden. Byddiʼn byw gydaʼr paganiaid eraill gafodd eu lladd âʼr cleddyf!’ Dyna fydd yn digwydd iʼr Pharo aʼi fyddin enfawr,” meddaiʼr Meistr, yr ARGLWYDD.