¹Mae pryfed marw'n gwneud i bersawr ddrewi,

ac mae ychydig ffolineb yn gallu troi'r fantol yn erbyn doethineb mawr.

²Mae gogwydd y doeth at y da,

ond mae'r ffŵl yn dewis y drwg.

³Mae'r ffordd mae'r ffŵl yn ymddwyn

yn dangos i bawb ei fod yn dwpsyn!

⁴Pan mae'r llywodraethwr wedi gwylltio gyda ti, paid symud;

wrth i ti beidio cynhyrfu bydd ei dymer e'n tawelu.

⁵Dyma beth ofnadwy arall dw i wedi'i weld –

camgymeriad mae llywodraethwr yn gallu ei wneud:

⁶Ffyliaid yn cael eu gosod mewn safle o awdurdod,

a phobl fonheddig yn cael eu hunain ar y gwaelod.

⁷Dw i wedi gweld caethweision ar gefn ceffylau

a thywysogion yn cerdded ar droed fel gweision.

⁸Gall rhywun sy'n cloddio twll syrthio i mewn iddo,

a'r un sy'n torri drwy wal gerrig gael ei frathu gan neidr.

⁹Gall gweithiwr mewn chwarel gael ei anafu gan y meini,

a'r un sy'n hollti coed gael niwed gan y coed.

¹⁰Os nad oes min ar y fwyell, os na chafodd ei hogi,

rhaid i rywun ddefnyddio mwy o egni.

Mae doethineb bob amser yn helpu!

¹¹Os ydy neidr yn brathu cyn cael ei swyno,

mae'r swynwr wedi methu!

¹²Mae geiriau'r doeth yn ennill ffafr,

ond mae'r ffŵl yn dinistrio'i hun gyda'i eiriau.

¹³Mae'n dechrau drwy siarad dwli,

ac yn darfod drwy ddweud pethau hollol wallgof.

¹⁴Mae'r ffŵl yn siarad gormod!

Does neb yn gwybod beth sy'n mynd i ddigwydd,

hyd yn oed pan mae ar fin digwydd. Pwy sy'n gallu dweud?

¹⁵Mae gwaith yn blino'r ffŵl yn lân,

dydy e byth yn gwybod ble mae e'n mynd.

¹⁶Gwae'r wlad sydd â brenin plentynnaidd,

a'i thywysogion yn dechrau gwledda'n gynnar yn y bore!

¹⁷Ond mae'n braf ar bobl sydd â'u brenin yn gallu rheoli,

a'u tywysogion yn gwybod pryd mae'n iawn i wledda

– dan reolaeth, ac nid i feddwi!

¹⁸Mae to sy'n syrthio yn ganlyniad diogi;

mae'n gollwng dŵr am fod dim wedi'i wneud.

¹⁹Mae bwyd yn cael ei baratoi i'w fwynhau,

ac mae gwin yn gwneud bywyd yn llon,

ond wrth gwrs arian ydy'r ateb i bopeth!

²⁰Paid hyd yn oed meddwl beirniadu'r brenin,

na melltithio pobl gyfoethog yn dy ystafell wely.

Gallai aderyn bach ddweud wrth eraill,

neu ailadrodd beth ddwedaist ti.