Salm Solomon.

1Ro dha vreusow dhe'n myghtern,

A Dhuw, ha'th ewnder dhe vab an myghtern.

2Re vreusso ev dha bobel gans ewnder,

ha'th voghosogyon gans gwirvreus.

3Re dhrollo an menydhyow kres dhe'n bobel,

ha'n brennow, dre ewnder.

4Re vreusso ev an voghosogyon yn mysk an bobel,

ha re sawyo mebyon an den edhommek,

ha brewi an den a'm gwask.

5Re borthons own ahanas72:5 Re borthons own ahanas: Po amendyans, ow siwya an Septuagint Re dhuryo. hedre vo an howl ow pesya,

ha hedre vo an loer, a unn henedh dhe'n nessa.

6Ev a dhiyskynn avel glaw war an gwels goera,

avel kowasow a dhowrha an nor.

7Yn y dhydhyow gwiryonedh a vleujyow,

ha palster kres, erna hettho an loer.

8Hag ev a'n jeves maystri a vor dhe vor,

ha dhiworth an avon bys yn pennow an norvys.

9An re usi trigys y'n difeyth a bleg a-dheragdho;

y eskerens a lap an doust.

10Myghternedh Tarshish ha'n ynysow

a re trubyt;

myghternedh Sheba ha Seba

a dhre rohow.

11Ha'n vyghternedh oll a omblek a-dheragdho;

oll an kenedhlow a vydh y sojets.

12Rag ev a dhelirv an edhommek pan gri rag gweres,

ha'n boghosek ma nag eus dhodho gwereser.

13Ev a gemmer truedh a'n den gwann ha'n edhommek,

hag ev a selow enevow an edhommogyon.

14Ev a bren aga enev dhiworth arwask ha garowder,

ha drudh vydh aga goes yn y wolok ev.

15Ev a vew,

ha dhodho y fydh res owr dhiworth Sheba;

i a bys ragdho heb hedhi,

ha'y venniga oll an jydh.

16Y fydh kals ys y'n nor

ow tegrena war benn an menydhyow;

y frut a vydh avel Lebanon,

ha tus an sita a siwen

avel gwels an nor.

17Y hanow a dhur bys vykken;

y hanow a vydh fastys a-dherag an howl;

tus a vydh bennigys ynno;

an kenedhlow oll a'n gelow bennigys.

18Bennigys re bo an ARLOEDH Duw, Duw Ysrael,

neb y honan a wra marthusyon;

19Ha bennigys re bo y hanow gloryus bynitha,

hag oll an nor a vydh lenwys a'y wolewder.

Amen hag Amen.

20Pysadow Davydh mab Yesse yw diwedhys.