Niveryans an Bobel, ha Plag

1Satnas a sevis erbynn Ysrael hag ynnia war Davydh nivera pobel Ysrael. 2Ytho Davydh a leveris dhe Yoab ha dhe gaslewydhyon an lu, ‘Kewgh, niverewgh Ysrael, dhiworth Beer-sheba bys yn Dan, ha drewgh derivas dhymm, may hylliv godhvos aga niver.’ 3Mes Yoab a leveris, ‘Re geworro an ARLOEDH dh'y bobel kanskweyth kekemmys! Ow arloedh an myghtern, a nyns yns i oll gwesyon ow arloedh? Prag ytho y fynn ow arloedh gul hemma? Prag y fydh blam dres war Ysrael?’ 4Mes ger an myghtern a warthevyas erbynn Yoab. Ytho Yoab a dhibarthas ha mos der oll Ysrael, hag ena dehweles dhe Yerusalem 5Yoab a ros sommenn niveryans an bobel dhe Davydh. Yth esa yn oll Ysrael milvil gledhevor ha kans mil, hag yn Yuda peswar kans ha deg ha tri-ugens mil gledhevor. 6Mes ny niveras Yoab Levi na Benyamin y'n niveryans drefenn arghadow an myghtern dhe vos kasadow dhe Yoab.

7Duw ynwedh a veu displesys gans an dra ma, hag ev a weskis Ysrael. 8Davydh a leveris dhe Dhuw, ‘My re beghas yn feur drefenn my dhe wul an dra ma. Lemmyn, my a'th pys, kemmer dhe-ves kammweyth dha was, rag my re beu pur foll.’ 9An ARLOEDH a gewsis orth Gad, gwelesydh Davydh, ow leverel, 10‘Ke ha lavar dhe Davydh, “Yndellma y lever an ARLOEDH: My a brof dhis tri thra; dewis onan anedha, ha my a'n gwra dhis.” ’ 11Gad a dheuth dhe Davydh ha leverel dhodho, ‘Yndellma y lever an ARLOEDH: “Gwra dha dhewis: 12po teyr blydhen a dhivoetter, po tri mis ow fia21:12 ow fia: Ow siwya an Septuagint ha 2Sa 24:13. a-rag dha eskerens ha kledha dha eskerens orth dha dhistrui; po tri dydh a gledha an ARLOEDH, plag y'n pow hag el an ARLOEDH ow tistrui dres oll tiredh Ysrael.” Lemmyn ervir py gorthyp y kemmerav dhodho ev neb a'm dannvonas.’ 13Davydh a leveris dhe Gad, ‘Yth esov yn ahwer meur. Gas vy dhe goedha yn leuv an ARLOEDH, rag pur vras yw y druedh; mes na as vy dhe goedha yn leuv mab-den.’

14Ytho an ARLOEDH a dhannvonas plag war Ysrael; ha deg ha tri-ugens gour Ysrael a goedhas. 15Duw a dhannvonas el dhe Yerusalem dh'y distrui; mes pan o ev parys dh'y distrui, an ARLOEDH a welas, hag ev a'n jevo edrek a'n drog, hag ev a leveris dhe'n el esa ow tistrui, ‘Henn yw lowr, lemmyn lows dha leuv.’ Yth esa el an ARLOEDH ow sevel ryb leur-drushya Ornan an Yebusyas. 16Davydh a dhrehevis y dhewlagas ha gweles el an ARLOEDH ow sevel yntra nor ha nev, hag yn y leuv kledha noeth ystynnys yn-mes war Yerusalem. Y'n eur na Davydh ha'n henavogyon, gwiskys yn yskar, a goedhas war aga fas. 17Davydh a leveris dhe Dhuw, ‘A nyns yw my a ros an arghadow dhe nivera an bobel? Yth yw my re beghas ha re wrug drog. Mes an deves ma, pandr'a wrussons i? Bedhes dha leuv, my a'th pys, A ARLOEDH ow Duw, er ow fynn hag erbynn teylu ow thas, mes na as an plag dhe vos war dha bobel.’

Davydh a Dhrehav Alter dhe'n ARLOEDH

18Ena el an ARLOEDH a erghis dhe Gad dhe leverel dhe Davydh mayth ella yn-bann ha drehevel alter dhe'n ARLOEDH war leur-drushya Ornan an Yebusyas. 19Ytho Davydh eth yn-bann herwydh ger Gad re gowssa yn hanow an ARLOEDH. 20Lemmyn yth esa Ornan ow trushya gwaneth; ev a dreylyas ha gweles an el, ha'y beswar mab esa ganso a omgelas. 21Pan dheuth Davydh dhe Ornan, Ornan a viras ha gweles Davydh, hag ev eth yn-mes a'n leur-drushya, ha omblegya dhe Davydh gans y fas dhe'n leur. 22Davydh a leveris dhe Ornan, ‘Ro dhymm tyller an leur-drushya may treheffiv warnodho alter dhe'n ARLOEDH; ro e dhymm rag an pris leun, may fo an plag treylys dhe-ves dhiworth an bobel.’ 23Ornan a leveris dhe Davydh, ‘Kemmer e, ha gwres ow arloedh an myghtern an pyth a hevel da dhodho. Mir, my a re dhis an oghen rag offrynnow leskys ha'n draylellow-drushya rag an prennyer, ha'n gwaneth rag offrynnow greun. My a re pup-tra oll.’ 24Mes myghtern Davydh a leveris dhe Ornan, ‘Na; mes my a'n prenn dhiworthis rag an pris leun. Ny gemmerav rag an ARLOEDH an pyth yw dhis, nag offra offrynnow leskys na gostyas travyth.’ 25Ytho Davydh a dylis dhe Ornan hwegh kans shekel a owr orth poes rag an tyller. 26Davydh a dhrehevis alter ena dhe'n ARLOEDH ha sakrifia offrynnow leskys hag offrynnow kres. Ev a elwis war an ARLOEDH, hag ev a'n gorthybis dre dan a nev war alter an offrynn leskys. 27An ARLOEDH a gewsis dhe'n el, hag ev a worras y gledha arta yn y woen.

An Tyller rag an Tempel

28Y'n termyn na, pan welas Davydh an ARLOEDH dhe worthybi dhodho orth leur-drushya Ornan an Yebusyas, ev a sakrifias ena. 29Rag yth esa tabernakel an ARLOEDH re wrussa Moyses y'n gwylvos, hag alter an offrynn leskys y'n termyn na y'n tyller ughel yn Gibeon; 30mes ny allas Davydh mos a-rygdhi dhe hwilas mynnas Duw, rag own a'n jeva a gledha el an ARLOEDH.