Pwy fydd yn fy ngwaredu?: Rhufeiniaid 7.7–25 (16 Awst 2020)

Gweddi

Arglwydd, agor fy nghlustiau i glywed yr hyn sydd gennyt i’w ddweud wrthyf; agor fy nghalon i garu dy air, ac agor fy meddwl i ddeall dy wirionedd.

Darllen

1 Samuel 9 Rhufeiniaid 7 Jeremeia 46 Salm 22

Myfyrdod Dyddiol: Rhufeiniaid 7

Nid oes pennod o waith Paul sydd wedi’i thrafod a’i dadlau cymaint â Rhufeiniaid 7, ac y mae’n sicr yn gymhleth. Ond mae yna rai gwirioneddau syml yma hefyd. Dywed, ‘Heb y Gyfraith fyddwn i ddim yn gwybod mod i'n pechu’ (adnod 7). Gall fod yn gyffyrddus byw mewn parth heb foesoldeb, lle mai dewis personol yw’r daioni uchaf. Dyna dirwedd gyfarwydd heddiw. Mae syniadau fel da a drwg, dyletswydd a chyfrifoldeb yn gwneud bywyd yn llawer anoddach. Rydym yn dod yn ymwybodol o’n methiannau a’n pechodau. Dyna pam nad yw’r Eglwys byth yn boblogaidd pan mae’n gwneud ei gwaith yn iawn: 'She tells them of Life and Death, and of all that they would forget', meddai T.S. Eliot. Yna rydym yn canfod nad ydym yn gallu cyfateb â’n delfrydau a’n huchelgeisiau. Fel cymdeithasau ac fel unigolion, rydym yn canfod ein hunain yn crwydro oddi ar y trywydd iawn, yn gwybod beth y dylen ni wneud ond yn methu ei wneud oherwydd ein bod ni’n anfodlon i’w wneud (adnod 19).

Dyma ble rydym yn dychwelyd at neges yr ychydig benodau blaenorol: mae gafael haearnaidd pechod yn cael ei dorri gan farwolaeth Crist, ond mae’n dal i fod yno yn barod i’n dal. Bywyd atgyfodedig Crist sy’n gadael inni fyw yn rhydd ac yn fuddugol. Wedi ein codi gydag ef, nid ydym bellach dan rym pechod. Mae’r gyfraith – p’run ai Cyfraith Moses neu gyfraith foesol ein cydwybodau – yn ganllaw defnyddiol yn hytrach nag yn boenydiwr. Gallwn fyw mewn heddwch â Duw trwy fyw yng ngrym y Crist atgyfodedig.

Gweddi

Duw, mae’n ddrwg gen i am fy holl fethiannau tuag atat. Helpa fi i sylweddoli dy fod ti wedi fy rhyddhau rhag pechod, a gad i mi fyw i ti yng ngrym atgyfodiad Crist.