Mae Myfyrdodau Dyddiol Cymdeithas y Beibl yn dilyn cynllun darllen Beibl M'Cheyne, a ddyluniwyd ar gyfer y rhai sydd am ddarllen y Beibl cyfan mewn blwyddyn. Mae pob myfyrdod yn canolbwyntio ar un o'i bedair pennod ddyddiol. Darllenwch rhain yn Gymraeg.
Arglwydd, agor fy nghlustiau i glywed yr hyn sydd gen ti i’w ddweud wrthyf; agor fy nghalon i garu dy air, ac agor fy meddwl i ddeall dy wirionedd.
Mae’r bennod hon yn llawn cwestiynau – cyfrwch nhw! Mae rhai yn cael eu hateb â ffeithiau syml, mae rhai yn cael eu hateb â chelwydd syml, ac eraill yn rhethregol, gyda’r bwriad o wneud pwynt yn hytrach na gofyn am wybodaeth. Ond pan ddown ni at y sgwrs rhwng Pilat ac Iesu, mae’r cwestiynau’n mynd i fyd arall yn llwyr.
Mae Pilat yn gofyn yn gyntaf a yw Iesu’n frenin. Mae eisiau gwybod a yw’n delio â bygythiad i rym gwleidyddol a milwrol Rhufeinig. Mae Iesu’n ateb y cwestiwn, fel petai yn frenin, nad yw ei deyrnas ‘ddim o’r byd yma’ (adnod 36). Ar y wyneb, mae hyn yn galonogol: nid yw dilynwyr Iesu yn ymladd yn erbyn y Rhufeiniaid am reolaeth tiriogaeth. Yn fodlon, mae Pilat yn gadael iddo fod – heb ddychmygu bod y deyrnas arallfydol hon mewn degawdau a chanrifoedd i ddod i wrthdroi ymerodraethau trwy ddal teyrngarwch calonnau, meddyliau ac ysbrydion unigol.
O’r diwedd, fodd bynnag, pan ddywed Iesu, Mae pawb sydd ar ochr y gwir yn gwrando arna i’ (adnod 37), mae Pilat yn codi un o’r cwestiynau dirfodol mawr hynny sydd wedi cael eu trafod o’r hen amser hyd at heddiw, ‘Beth ydy gwirionedd?’ (adnod 38). A yw gwirionedd yn ddyfnach na’r hyn yr ydym yn ei ganfod gyda’n synhwyrau, neu a yw i’w gael ar wyneb pethau yn unig? A yw’n absoliwt neu’n gymharol? Os yw ‘gwirionedd’ yn bodoli, a allem ni ei wybod?
Nid yw Pilat yn aros i Iesu roi ateb i’r daranfollt o gwestiwn. Efallai nad yw eisiau gwybod mewn gwirionedd. Yn ein cymdeithas ein hunain, y farn a dderbynnir yn eang yw efallai na fydd yr hyn sy’n wir i mi yn wir i chi – ond efallai y bu newid cynnil yn ystod y blynyddoedd diwethaf wrth i beryglon camwybodaeth trwy’r cyfryngau cymdeithasol ddod yn fwy amlwg. Mae pobl yn cwyno am fethu ag ymddiried yn addewidion ein harweinwyr. Efallai, heddiw, ein bod ni wir eisiau gwybod ‘Beth yw gwirionedd?’
‘Ond rwyt ti eisiau gonestrwydd y tu mewn; rwyt ti eisiau i mi fod yn ddoeth’ (Salm 51.6). Helpa ni, Arglwydd i geisio gwirionedd, llefaru gwirionedd a charu gwirionedd. Yn enw Iesu.
Ysgrifennwyd y myfyrdod hwn gan Lisa Cherrett, Rheolwr Prosiect Golygyddol yn y tîm Cyhoeddi.
Read the Bible 
Processing...