CAB. VII

1As haink eh gy-kione rish lhing Ahaz mac Yotham, mac Uzziah ree Yudah, dy jagh Rezin ree Syria, as Pekah, mac Remaliah, ree Israel, seose gys Jerusalem, dy chaggey n’oï, agh cha daink eh lhieu dy ghoaill eh. 2As ve er ny insh da thie Ghavid, gra, Ta Syria ayns coardail rish Ephraim: as va’n cree echey er ny ghleashagh, as cree e phobble, myr ta biljyn y cheyll er nyn leaystey lesh y gheay. 3Eisht dooyrt y Chiarn rish Isaiah, Immee magh nish quail Ahaz, uss, as Shear-jashub dty vac, ec kione coorse-ushtey yn loghan syrjey, ta er y raad-vooar rish magher y ghialleyder; 4As abbyr rish, Gow tastey, as bee ec fea; ny bee aggle ort, chamoo bee lhag-chreeagh, kyndagh rish daa amman jaaghagh ny maidjyn losht shoh, kyndagh rish farg eulyssagh Rezin marish Syria, as mac Remaliah. 5Er-yn-oyr dy vel Syria, Ephraim, as mac Remaliah, er ghoaill drogh choyrle dt’oï’s, gra, 6Lhig dooin goll seose noi Judah, as eh y heaghney, as brishey stiagh er, as ree y hoiaghey seose ayns y vean echey, eer mac Tabeal: 7Myr shoh ta’n Chiarn Jee dy ghra, Cha jean y choyrle shoh shassoo, chamoo hig eh gy-kione. 8Son ta Damascus kione Syria, as Rezin kione Ghamascus; as cheu-sthie jeh three-feed bleïn as queig bee Ephraim naardey, nagh bee eh ny phobble. 9As kione Ephraim Samaria, as kione Samaria mac Remaliah. Mannagh jean shiu credjal, son firrinys cha bee shiu er ny hickyraghey.

10Ny-sodjey na shoh, loayr y Chiarn reesht rish Ahaz, gra, 11Shir cowrey veih yn Chiarn dty Yee; shir eh edyr ayns y diunid heese, ny ayns yn yrjid heose. 12Agh dooyrt Ahaz, Cha jean-ym shirrey, chamoo nee’m yn Chiarn y phrowal. 13As dooyrt eh, Clasht-jee nish, O hie Ghavid; Nagh vel eh dy liooar diuish dy yannoo skee jeh deiney, agh jean shiu skee y yannoo jeh my Yee myrgeddin? 14Shen-y-fa ver y Chiarn hene cowrey diu: Cur-my-ner, nee moidyn gientyn, as mac y choyrt son y theihll, as bee eh enmyssit Immanuel. 15Eeym as mill nee eh gee, derrey vees toiggal echey dy obbal yn olk, as dy reih yn mie. 16Son roish my vees toiggal ec y lhiannoo dy obbal yn olk, as dy reih yn mie, bee’n cheer ta dwoaie ayd urree treigit liorish y daa ree eck.

17Ver y Chiarn lesh ort’s, as er dty phobble, as er thie dty ayrey, laghyn nagh daink nyn lheid er-dyn laa jimmee Ephraim veih Judah; eer ree Assyria. 18As hig eh gy-kione ayns y laa shen dy der y Chiarn magh larm-caggee son y veishteig ta ayns yn ard sodjey magh jeh awin Egypt, as son y chellan ta ayns cheer Assyria: 19As hig ad, as nee ad ooilley lhie er ny coanyn treigit, as ayns ny ooigyn t’ayns ny creggyn, as er dy chooilley skeaig-ghrine, as er dy chooilley hammag. 20Ayns y laa cheddin nee yn Chiarn baarey folt y ching as fynney ny cassyn, lesh razor failt, ta shen dy ghra, liorish ree Assyria, ta er cheu elley jeh’n awin, as nee eh myrgeddin giarey jeh yn aasaag. 21As hig eh gy-kione ayns y laa shen, dy jean dooinney freayll gounagh as daa cheyrrey: 22As hig eh gy-kione, son y palchey dy vainney nee ad y choyrt, dy jean eh gee eeym: son eeym as mill nee dy chooilley unnane gee ta faagit ’sy cheer. 23As hig eh gy-kione ’sy laa shen, dy bee dy chooilley ynnyd, raad va thousane billey-feeyney [soit] son thousane shekel, dy bee eh eer fo dressyn as drineyn. 24Lesh sideyn as lesh bowghyn hig deiney ayn; er-yn-oyr dy bee ooilley yn cheer fo dressyn as drineyn. 25As er dy chooilley chronk, vees er ny chleiy lesh y chiebbey, cha bee aggle dy jig er shen dressyn ny drineyn; agh bee eh son aber da ny dew, as dy ve fo shioltaneyn keyrragh.