Dhe vester an keur: gans daffar kerdyn; war Sheminith. Salm a Davydh.

1A Arloedh, na rebuk vy y'th sorr,

ha na geredh vy y'th konnar.

2Bydh grassyes orthiv, A Arloedh, rag difredh ov vy;

yaghha vy, A Arloedh, rag ow eskern yw troblys.

3Ow enev ynwedh yw pur dhyegrys.

Mes ty, A Arloedh – pygemmys prys?

4Dehwel, A Arloedh, delirv ow enev;

salw vy a-barth dha dregeredh.

5Rag yn ankow nyns eus kov ahanas;

piw a'th wormel yn ifarn?

6Skwith ov vy a'm hanasa;

pub nos my a lyb ow gweli;

gans ow dagrow my a soub ow growedhva.

7Ow lagas a fyll drefenn poenvos;

ev a wannha drefenn ow eskerens oll.

8Diberthewgh dhiworthiv, hwi dhrogoberoryon oll;

rag an Arloedh re glewas lev ow oelva.

9An Arloedh re glewas ow govynnadow;

an Arloedh a dhegemmer ow fysadow.

10Oll ow eskerens a berth meth hag a vydh euthegys;

i a dreyl war-dhelergh, hag a berth meth yn tromm.