Daniel ha'y Gowetha yn Lys Nebukadnessar

1Y'n nessa blydhen a reyn Yehoyakim myghtern Yuda, Nebukadnessar myghtern Babylon a dheuth dhe Yerusalem hag omsettya a-dro dhedhi. 2Ha'n Arloedh a worras yn y dhorn Yehoyakim myghtern Yuda, ha re a'n lestri dhiworth chi Duw; hag ev a's kyrghas dhe bow Shinar,1:2 Shinar yw Babylonia. dhe ji y dhuw, hag a worras an lestri yn tresorva y dhuw.

3Ena an myghtern a worhemmynnis dhe Ashpenaz, penn y spadhesigyon, dhe gyrghes dhodho re a vebyon Ysrael, keffrys a'n teylu ryel ha'n welhevin, 4gwer yowynk dhinamm, teg dhe weles, ha konnyk yn pub furneth, leun a skians, ow konvedhes dyskans, ha gwiw rag servya yn palys an myghtern, ha dhe dhyski dhedha lytherennow ha taves an Kaldeanys. 5An myghtern a dhewisis ragdha rann bub-dydhyek a voes an myghtern, ha'n gwin a wre y eva y honan, dhe vos megys yndella dre deyr blydhen; may hallens sevel a-rag an myghtern orth diwedh an termyn na. 6Yn mysk an Yedhewon ma yth esa Daniel, Hanania, Mishael hag Azaria. 7Ha penn an spadhesigyon a ros dhedha les-henwyn: Daniel a henwis Belteshassar, Hanania a henwis Shadrak, Mishael a henwis Meshak, hag Azaria a henwis Abednego.

8Mes Daniel a erviras yn y golonn na omdhefolsa gans boes an myghtern, na gans an gwin a wre y eva; ytho ev a wovynnas kummyas dhiworth penn an spadhesigyon ma na omdhefolla. 9Ha Duw a wrug dhe benn an spadhesigyon diskwedhes favour ha truedh dhe Daniel. 10Yn-medh penn an spadhesigyon dhe Daniel, ‘Own a'm beus rag ow arloedh an myghtern, neb a dhewisis agas boes ha'gas diwes, may hwello bos agas tremmynn moenna ages tremmynn an vebyon a'n keth oes ha hwi. Yndella hwi a worrsa ow fenn yn peryll drefenn an myghtern.’ 11Ena yn-medh Daniel dhe'n rennyas, neb re bia apoyntys mester war Daniel, Hanania, Mishael hag Azaria gans penn an spadhesigyon: 12‘My a'th pys, gwra previ dha servysi dre dheg dydhweyth; re bo res dhyn losow dhe dhybri ha dowr dhe eva. 13Ena bedhes gwelys agan semlans, ha semlans an vebyon neb a dheber boes an myghtern; ha herwydh an pyth a welydh, gwra dyghtya dha servysi.’ 14Ytho ev a woslowas orta y'n mater ma, ha'ga frevi deg dydhweyth. 15Orth diwedh deg dydhweyth y hwelys bos gwell aga semlans ha tewa aga hig ages oll an vebyon neb a dhybri boes an myghtern. 16Ytho an rennyas a dhug dhe-ves aga boes, ha'ga gwin dhe eva, hag a ros dhedha losow. 17Dhe'n peswar mab ma, Duw a ros dyskans ha skians yn pub lyenn ha furneth; ha Daniel a gonvedhi pub gwelesigeth ha hunros.

18Orth penn an dydhyow, pan leveris an myghtern dh'aga hyrghes, penn an spadhesigyon a's dros a-rag Nebukadnessar. 19Ha'n myghtern a gewsis gansa, ha nyns esa nagonan yn mysk oll an vebyon avel Daniel, Hanania, Mishael hag Azaria, pan sevsons a-rag an myghtern. 20Yn pub mater a furneth po a gonvedhes hag a veu govynnys dhiworta gans an myghtern, ev a's kavas deg gweyth gwell ages oll an hudoryon ha'n worhenysi esa yn y ruvaneth oll. 21Ha Daniel a veu ena bys yn kynsa blydhen1:21 Henn yw 539, kynsa blydhen reyn Kyrus avel myghtern Babylon. myghtern Kyrus.