Online Bible

Read the Bible

Version
Book
Chapter

Psalmyn 65

PSALM 65

1T’ou uss, O Yee, er ny voylley ayns Sion: as dhyt’s vees y breearrey er ny chooilleeney ayns Jerusalem.

2Uss ta clashtyn y phadjer: hood’s nee dy chooilley eill cheet.

3Ta my ghrogh-yannoo geddyn y varriaght orrym: O bee uss myghinagh da nyn beccaghyn.

4Bannit ta’n dooinney t’ou uss dy reih, as dy ghoaill hood hene: nee eh baghey ayns dty chooyrt, as bee eh jeant magh lesh eunyssyn dty hie, dy jarroo dy dty hiamble casherick.

5Nee oo jeeaghyn dooin reddyn yindyssagh ayns dty chairys, O Yee nyn Saualtys: uss ta sauchys ooilley king y theihll, as dauesyn ta cummal er y faarkey lhean.

6Ta ayns e niart soiaghey ny sleityn dy shickyr: as t’er ny choamrey lesh pooar.

7Ta kiunaghey sterrym ny marrey: as feiyr ny tonnyn echey, as mee-reiltys y phobble.

8Adsyn myrgeddin ta baghey ayns ny ayrnyn sodjey magh jeh’n seihll, vees agglagh roish dty chowraghyn: uss ta cur er immeeaght y voghrey as yn astyr dy chur dhyt moylley.

9T’ou jeeaghyn er y thalloo, as dy vannaghey eh: t’ou jannoo eh feer vessoil.

10Ta awin Yee lane dy ushtey: t’ou cur er yn arroo oc bishaghey; son myr shoh t’ou kiarail son y seihll.

11T’ou gushtaghey ny creaghyn eck, t’ou cur fliaghey neose er ny coanyn beggey eck: t’ou boggaghey ee lesh ny bineyn dy ’liaghey, as bannaghey yn mess eck.

12T’ou coamrey yn vleïn lesh dty vieys: as ta dty vodjallyn shilley neose meeaylys.

13Nee ad shilley neose er cummallyn yn aasagh, as gowee ny croink veggey boggey er dagh cheu.

14Bee ny bwoailtchyn lane dy chirree: nee ny coanyn myrgeddin shassoo cha chiu lesh arroo, dy jean ad gearey as goaill arrane.