Online Bible

Read the Bible

Version
Book
Chapter

Psalmyn 66

PSALM 66

1O bee-jee gerjoil ayns Jee, ooilley shiuish cheeraghyn: gow-jee arraneyn-moyllee gys onnor e Ennym; cur-jee er e voylley dy ve gloyroil.

2Abbyr-jee rish Jee, O cre cha yindyssagh as t’ou ayns dt’obbraghyn: trooid mooadys dty phooar vees dty noidyn er nyn gheddyn nyn mreageryn ayns dty enish.

3Son nee ooilley yn seihll ooashley ’chur dhyt: goaill arrane jeed, as moylley dt’Ennym.

4O tar-jee ayns shoh, as cur-jee tastey da obbraghyn Yee: cre cha yindyssagh as t’eh ayns e yannoo gys cloan gheiney!

5Hyndaa eh yn faarkey gys thalloo chirrym: myr shen dy jagh ad trooid yn ushtey rish nyn gosh; ayns shen ghow shin boggey jeh.

6T’eh reill lesh e phooar son dy bragh; ta e hooillyn cur tastey da’n pobble: as ny lheid as nagh jean credjal, cha bee abyl ad-hene y hoiaghey seose.

7O cur-jee moylley da’n Jee ain, shiuish phobble: as cur-jee er coraa e voylley dy ve er ny chlashtyn;

8Ta freayll yn annym ain ayns bioys: as nagh vel lhiggey da nyn gassyn dy skyrraghtyn,

9Son t’ou uss, O Yee, er phrowal shin: t’ou myrgeddin er hrial shin, myr ta argid er ny hrial.

10Hug oo lhiat shin ayns y ribbey: as hug oo seaghyn er nyn meeghyn.

11Lhig oo da deiney dy varkiagh harrish nyn ghing: hie shin trooid aile as ushtey, as hug oo lhiat shin magh gys ynnyd berchagh.

12Hem stiagh gys dty hie lesh chebballyn-losht: as eeck-ym dhyt my vreearraghyn, yiall mee lesh my veillyn, as loayr mee lesh my veeal, tra va mee ayns seaghyn.

13Cheb-yms dhyt ourallyn-losht roauyrey, marish oural-millish reaghyn: cheb-ym dew as goair.

14O tar-jee ayns shoh, as eaisht-jee, ooilley shiuish ta goaill aggle roish Jee: as insh-ym diu cre t’eh er n’yannoo son m’annym.

15Deïe mee er lesh my veeal: as hug mee moylley da lesh my hengey.

16My ta my chree goaill taitnys ayns mee-chairys: cha jean y Chiarn m’y chlashtyn.

17Agh ta Jee er my chlashtyn: as er choyrt tastey da coraa my phadjer.

18Moylley dy row gys Jee, nagh vel er hoiaghey beg jeh my phadjer: ny er hyndaa e vyghin voym.