Online Bible

Read the Bible

Version
Book
Chapter

Psalmyn 64

PSALM 64

1Clasht rish my choraa, O Yee, ayns my phadjer: freill my vioys veih aggle y noid.

2Follee mee veih chaglym-cooidjagh ny mee-viallee: as veih irree-magh ny drogh-yantee;

3T’er shleeu nyn jengey myr cliwe: as ta lhiggey nyn sideyn, dy jarroo goan sharroo;

4Dy vod ad dy follit lhiggey ersyn ta firrinagh: t’ad dy woalley eh doaltattym, as cha vel aggle orroo.

5T’ad jannoo ad-hene daaney ayns olkys: as cur nyn goyrle dy cheilley, kys oddys ad ribbaghyn y hoiaghey; as gra, nagh vaik dooinney erbee ad.

6T’ad smooinaghtyn dy dowin er olkys, as dy chliaghtey eh: shen t’ad dy reayll follit eddyr ad-hene, dy chooilley ghooinney ayns diunid e chree.

7Agh nee Jee lhiggey doaltattym orroo lesh side: dy bee ad dy leah lhottit.

8Dy feer, ver nyn jengaghyn hene orroo tuittym: ayns wheesh as dy jean adsyn ta fakin ad, garaghtee as craid y yannoo jeu.

9As jir dy chooilley ghooinney hee eh, She Jee t’er n’yannoo shoh: son ver ad tastey dy nee eh yn obbyr echeysyn.

10Gowee yn dooinney cairagh boggey ayns y Chiarn, as ver eh e hreishteil ayn: as nee adsyn ooilley ta firrinagh ayns cree, boggey ’ghoaill.