Online Bible

Read the Bible

Version
Book
Chapter

Psalmyn 27

PSALM 27

1Yn Chiarn my hoilshey as my haualtys; quoi roish eisht ghoym aggle: yn Chiarn niart my vea; quoi roish eisht vee’m agglagh?

2Tra haink ny olkyssee, dy jarroo my noidyn as my hranlaasee orrym dy my stroie: ren ad snapperal as tuittym.

3Ga dy beagh sheshaght-caggee dy gheiney soit m’oï, foast cha bee my chree agglagh: as ga dy jinnagh caggey girree seose m’oï, foast ver-ym my varrant ersyn.

4Un red ta mish er hirrey er y Chiarn, shen nee’m y yeearree: dy jarroo dy voddym baghey ayns thie yn Chiarn ooilley laghyn my vea, dy akin aalid eunyssagh y Chiarn, as dy haaghey e hiamble.

5Son ayns traa my heaghyn follee eh mee ayns e chabbane: dy jarroo ayns boayl keillit e ynnyd-vaghee nee eh m’y ollaghey, as m’y hoiaghey seose er creg chloaie.

6As nish troggee eh seose my chione: erskyn my noidyn mygeayrt-y-moom.

7Shen-y-fa neem’s oural y hebbal ayns e ynnyd casherick lesh ard-ghennallys: nee’m arrane y ghoaill, as soilshaghey magh moylley yn Chiarn.

8Eaisht rish my choraa, O Hiarn, tra ta mee geamagh hood’s: jean myghin orrym, as clasht rhym.

9Ta my chree er yannoo imraa jeed’s; Shir-jee my eddin: Dt’eddin, Hiarn, neem’s y hirrey.

10O ny follee dty eddin voym: chamoo jean dty harvaant y hyndaa ersooyl ayns jymmoose.

11T’ou er ny ve my chemmyrk: ny faag mee, chamoo jean m’y hreigeil, O Yee my haualtys.

12Tra ta my ayr as my voir dy my hreigeil: ta’n Chiarn dy my ghoaill seose.

13Ynsee dooys dty raad, O Hiarn: as leeid mee ayns y raad cair, kyndagh rish my noidyn.

14Ny livrey mee seose gys aigney my noidyn: son ta feanishyn foalsey er n’irree seose m’oï, as lheid as ta loayrt aggair.

15Va mee dy bollagh er choayl my chree: agh dy vel mee dy shickyr credjal dy akin kenjallys y Chiarn ayns cheer ny bioee.

16O jean uss farkiaght er caa yn Chiarn: bee dunnal, as nee eh gerjaghey dty chree, as cur uss dty hreishteil ayns y Chiarn.