Online Bible

Read the Bible

Version
Book
Chapter

Psalmyn 28

PSALM 28

1Hood’s nee’m geamagh, O Hiarn my niart: ny jean beg y hoiaghey jee’m, er-aggle mannagh jean oo m’y chlashtyn, dy bee’m casley roosyn ta goll sheese gys yn oaie.

2Eaisht rish coraa my aghinyn imlee, tra ta mee geamagh ort: tra ta mee troggal seose my laueyn gys stoyl-y-vyghin dty hiamble casherick.

3O ny tayrn mee ersooyl, chamoo jean m’y stroie marish ny mee-chrauee as drogh-yantee: ta loayrt dy dooie rish nyn naboo, agh t’ad smooinaghtyn er olkys ayns nyn gree.

4Cur daue nyn leagh cordail rish nyn yannoo: as cordail rish olkys ny croutyn oc hene.

5Cooilleen ad cordail rish obbyr nyn laueyn: eeck daue shen ny t’ad er hoilchin.

6Son cha vel ad ayns nyn aigney cur geill da obbraghyn y Chiarn, chamoo da jannoo e laueyn: shen-y-fa nee eh ad y lhieggal sheese, as cha jean eh ad y hroggal.

7Moylley dy row da’n Chiarn: son t’eh er chlashtyn coraa my aghinyn imlee.

8Yn Chiarn my niart as my eïlley-caggee; ta my chree er dreishteil aynsyn, as ta mee er gheddyn cooney: shen-y-fa ta my chree lheim dyn voggey, as ayns my arrane neem eshyn y voylley.

9Yn Chiarn my niart: as eshyn fendeilys slayntoil e er-ooilit.

10O saue dty phobble, as cur dty vannaght da dty eiraght: cur beaghey daue, as soie ad seose er son dy bragh.