Read the Bible

¹Canwch gân newydd i’r ARGLWYDD,

am ei fod wedi gwneud pethau anhygoel!

Mae ei fraich gref,

wedi ennill y fuddugoliaeth iddo.

²Mae’r ARGLWYDD wedi dangos ei allu i achub!

Mae wedi dangos i’r cenhedloedd ei fod yn Dduw cyfiawn.

³Mae wedi cofio’i gariad a’i ffyddlondeb i bobl Israel;

ac mae pawb drwy’r byd i gyd wedi gweld Duw yn achub.

⁴Dewch, bawb drwy’r byd i gyd,

gwaeddwch yn uchel i’r ARGLWYDD!

Gweiddi’n llawen, a chanu mawl iddo!

⁵Canwch fawl ar y delyn i’r ARGLWYDD;

canwch gân hyfryd i gyfeiliant y delyn!

⁶Seiniwch yr utgyrn a chwythu’r corn hwrdd.

Dewch, bawb drwy’r byd i gyd,

gwaeddwch yn uchel i’r ARGLWYDD, y Brenin!

⁷Boed i’r môr a phopeth sydd ynddo weiddi;

a’r byd hefyd, a phawb sy’n byw ynddo.

⁸Boed i’r afonydd guro dwylo,

ac i’r mynyddoedd ganu’n llawen gyda’i gilydd

⁹o flaen yr ARGLWYDD!

Achos mae e’n dod i roi trefn ar y ddaear.

Bydd e’n barnu’r byd yn hollol deg,

a’r bobloedd yn gwbl gyfiawn.