Read the Bible

²“Ysgubaf ymaith yn llwyr bopeth oddi ar wyneb y ddaear,” medd yr ARGLWYDD.

³“Ysgubaf ymaith ddyn ac anifail;

ysgubaf ymaith adar y nefoedd a physgod y môr;

darostyngaf y rhai drygionus,

a thorraf ymaith ddyn oddi ar wyneb y ddaear,” medd yr ARGLWYDD.

⁴“Estynnaf fy llaw yn erbyn Jwda

ac yn erbyn holl drigolion Jerwsalem;

a thorraf ymaith o'r lle hwn weddill Baal,

ac enw'r offeiriaid gau,

⁵a'r rhai sy'n ymgrymu ar bennau'r tai i lu'r nef,

y rhai sy'n ymgrymu ac yn tyngu i'r ARGLWYDD

ond hefyd yn tyngu i Milcom,

⁶a'r rhai sydd wedi cefnu ar yr ARGLWYDD,

ac nad ydynt yn ceisio'r ARGLWYDD nac yn ymgynghori ag ef.”

⁷Distawrwydd o flaen yr Arglwydd DDUW!

Oherwydd y mae dydd yr ARGLWYDD yn agos;

y mae'r ARGLWYDD wedi paratoi aberth

ac wedi cysegru ei wahoddedigion.

⁸“Ac ar ddydd aberth yr ARGLWYDD

mi gosbaf y swyddogion a'r tŷ brenhinol,

a phawb sy'n gwisgo dillad estron.

⁹Ar y dydd hwnnw

mi gosbaf bawb sy'n camu dros y rhiniog

ac yn llenwi tŷ eu harglwydd â thrais a thwyll.

¹⁰“Ar y dydd hwnnw,” medd yr ARGLWYDD,

“clywir gwaedd o Borth y Pysgod,

a chri o Ail Barth y ddinas,

a malurio trystfawr o'r bryniau.

¹¹Gwaeddwch, drigolion y Farchnad.

Oherwydd darfu am yr holl fasnachwyr,

a thorrwyd ymaith yr holl bwyswyr arian.

¹²“Yn yr amser hwnnw

chwiliaf Jerwsalem â llusernau,

a chosbaf y rhai sy'n ymbesgi uwch eu gwaddod

ac yn dweud wrthynt eu hunain,

‘Ni wna'r ARGLWYDD na da na drwg.’

¹³Anrheithir eu cyfoeth

a difethir eu tai;

codant dai, ond ni chânt fyw ynddynt;

plannant winllannoedd, ond ni chânt yfed eu gwin.”

¹⁴Y mae dydd mawr yr ARGLWYDD yn agos,

yn agos ac yn dod yn gyflym;

chwerw yw trwst dydd yr ARGLWYDD,

ac yna y gwaedda'r rhyfelwr yn uchel.

¹⁵Dydd dicter yw'r dydd hwnnw,

dydd blinder a gofid,

dydd dinistr a difrod,

dydd tywyllwch a düwch,

dydd cymylau a chaddug,

¹⁶dydd utgorn a bloedd rhyfel

yn erbyn y dinasoedd caerog

ac yn erbyn y tyrau uchel.

¹⁷“Mi ddof â thrybini ar bobl,

a cherddant fel deillion;

am iddynt bechu yn erbyn yr ARGLWYDD

tywelltir eu gwaed fel llwch

a'u perfedd fel tom,

¹⁸ac ni all eu harian na'u haur eu gwaredu.”

Ar ddydd dicter yr ARGLWYDD

ysir yr holl dir â thân ei lid,

oherwydd gwna ddiwedd, ie, yn fuan,

ar holl drigolion y ddaear.