Read the Bible

¹O ti, y decaf o ferched,

ple'r aeth dy gariad?

Pa ffordd yr aeth dy gariad,

inni chwilio amdano gyda thi?

²Fe aeth fy nghariad i lawr i'w ardd,

i'r gwelyau perlysiau,

i ofalu am y gerddi,

ac i gasglu'r lilïau.

³Yr wyf fi'n eiddo fy nghariad,

ac yntau'n eiddof finnau;

y mae'n bugeilio ymysg y lilïau.

⁴Yr wyt yn brydferth fel Tirsa, f'anwylyd,

yn hardd fel Jerwsalem,

mor urddasol â llu banerog.

⁵Tro dy lygaid oddi wrthyf,

y maent yn fy nghyffroi;

y mae dy wallt fel diadell o eifr

yn dod i lawr o Fynydd Gilead.

⁶Y mae dy ddannedd fel diadell o ddefaid

yn dod i fyny o'r olchfa,

y cwbl ohonynt yn efeilliaid,

heb un yn amddifad.

⁷Y tu ôl i'th orchudd y mae dy arlais

fel darn o bomgranad.

⁸Er bod trigain o freninesau

a phedwar ugain o ordderchwragedd,

a llancesau na ellir eu rhifo,

⁹y mae fy ngholomen, yr un berffaith,

ar ei phen ei hun,

unig blentyn ei mam,

y lanaf yng ngolwg yr un a esgorodd arni.

Gwelodd y merched hi a'i galw'n ddedwydd,

ac y mae breninesau a gordderchwragedd yn ei chlodfori.

¹⁰Pwy yw hon sy'n ymddangos fel y wawr,

yn brydferth fel y lloer, yn ddisglair fel yr haul,

yn urddasol fel llu banerog?

¹¹Euthum i lawr i'w ardd gnau

i edrych ar ffrwythau'r dyffryn,

a gweld a oedd y winwydden yn blaguro,

a blodau ar y pomgranadau.

¹²Ni wyddwn y cawn fy rhoi

yng ngherbydau perthnasau'r tywysog.

¹³Tyrd yn ôl, tyrd yn ôl, Sulames!

Tyrd yn ôl, tyrd yn ôl, gad inni dy weld.

O fel yr hoffwch edrych ar y Sulames

yn dawnsio rhwng y rhengoedd!