Read the Bible

¹Mor brydferth yw dy draed mewn sandalau. O ferch y tywysog!

Y mae dy gluniau lluniaidd fel gemau

o waith crefftwr medrus.

²Y mae dy fogail fel ffiol gron

nad yw byth yn brin o win cymysg;

y mae dy fol fel pentwr o wenith

wedi ei amgylchynu gan lilïau.

³Y mae dy ddwy fron fel dwy elain,

gefeilliaid ewig.

⁴Y mae dy wddf fel tŵr ifori,

a'th lygaid fel y llynnoedd yn Hesbon,

ger mynedfa Bath-rabbim;

y mae dy drwyn fel tŵr Lebanon,

sy'n edrych i gyfeiriad Damascus.

⁵Y mae dy ben yn ymddangos fel Carmel

a gwallt dy ben fel porffor,

a brenin wedi ei garcharu yn y plethi.

⁶Mor brydferth, mor hardd wyt,

fy anwylyd, y fwyaf dymunol.

⁷Y mae dy gorff fel palmwydden,

a'th fronnau fel clwstwr o'i ffrwythau.

⁸Dywedais, “Dringaf y balmwydden,

a gafael yn ei brigau.”

Bydded dy fronnau fel clwstwr o rawnwin,

ac arogl dy anadl fel afalau,

⁹a'th wefusau fel y gwin gorau

yn llifo'n esmwyth mewn cariad,

ac yn llithro rhwng gwefusau a dannedd.

¹⁰Yr wyf fi'n eiddo i'm cariad,

ac yntau'n fy chwennych.

¹¹Tyrd, fy nghariad, gad inni fynd allan i'r maes,

a threulio'r nos ymysg y llwyni henna.

¹²Gad inni fynd yn fore i'r gwinllannoedd,

i edrych a yw'r winwydden yn blaguro,

a'i blodau yn agor,

a'r pomgranadau yn blodeuo;

yno fe ddangosaf fy nghariad tuag atat.

¹³Y mae'r mandragorau yn gwasgar eu harogl;

o gwmpas ein drws ceir yr holl ffrwythau gorau,

ffrwythau newydd a hen

a gedwais i ti, fy nghariad.