Read the Bible

¹Yr wyf wedi dod i'm gardd, fy chwaer a'm priodferch;

cesglais fy myrr a'm perlysiau,

a bwyta fy niliau a'm mêl,

ac yfed fy ngwin a'm llaeth.

Gyfeillion, bwytewch ac yfwch,

nes meddwi ar gariad.

²Yr oeddwn yn cysgu, ond â'm calon yn effro.

Ust! Y mae fy nghariad yn curo:

“Agor imi, fy chwaer, f'anwylyd,

fy ngholomen, yr un berffaith yn fy ngolwg,

oherwydd y mae fy ngwallt yn diferu o wlith,

a'm barf o ddefnynnau'r nos.”

³Ond yr wyf wedi diosg fy mantell;

a oes raid imi ei gwisgo eto?

Yr wyf wedi golchi fy nhraed;

a oes raid imi eu maeddu eto?

⁴Pan roes fy nghariad ei law ar y glicied,

yr oeddwn wedi fy nghynhyrfu trwof.

⁵Codais i agor i'm cariad,

ac yr oedd fy nwylo'n diferu o fyrr,

a'r myrr o'm bysedd yn llifo ar ddolennau'r clo.

⁶Pan agorais i'm cariad,

yr oedd wedi cilio a mynd ymaith,

ac yr oeddwn yn drist am ei fod wedi mynd;

chwiliais amdano, ond heb ei gael;

gelwais arno, ond nid oedd yn ateb.

⁷Daeth y gwylwyr i'm cyfarfod,

wrth iddynt fynd o amgylch y dref,

a rhoesant gurfa imi a'm niweidio;

bu i'r rhai oedd yn gwylio'r mur

ddwyn fy mantell oddi arnaf.

⁸Ferched Jerwsalem, yr wyf yn ymbil arnoch.

Os dewch o hyd i'm cariad,

dywedwch wrtho fy mod yn glaf o gariad.

⁹A yw dy gariad di yn well nag eraill,

O ti, y decaf o ferched?

A yw dy gariad di yn well nag eraill,

i beri iti ymbil fel hyn arnom?

¹⁰Y mae fy nghariad yn deg a gwridog,

yn sefyll allan ymysg deng mil.

¹¹Y mae ei ben fel aur coeth,

a'i wallt yn gyrliog,

yn ddu fel y frân.

¹²Y mae ei lygaid fel colomennod

wrth ffrydiau dŵr,

wedi eu golchi â llaeth,

a'u gosod yn briodol yn eu lle.

¹³Y mae ei ruddiau fel gwely perlysiau

yn gwasgaru persawr;

y mae ei wefusau fel lilïau

yn diferu o fyrr rhedegog.

¹⁴Y mae ei ddwylo fel dysglau aur

yn llawn gemau;

y mae ei gorff fel gwaith ifori

wedi ei orchuddio â saffir.

¹⁵Y mae ei goesau fel colofnau o farmor,

wedi eu gosod ar sylfaen o aur,

a'i ymddangosiad fel Lebanon,

mor urddasol â'r cedrwydd.

¹⁶Y mae ei wefusau yn felys;

y mae popeth ynddo'n ddymunol.

Un fel hyn yw fy nghariad,

un fel hyn yw fy nghyfaill,

O ferched Jerwsalem.