Read the Bible

¹Yn sicr, da yw Duw i'r uniawn,

a'r Arglwydd i'r rhai pur o galon.

²Yr oedd fy nhraed bron â baglu,

a bu ond y dim i'm gwadnau lithro,

³am fy mod yn cenfigennu wrth y trahaus

ac yn eiddigeddus o lwyddiant y drygionus.

⁴Oherwydd nid oes ganddynt hwy ofidiau;

y mae eu cyrff yn iach a graenus.

⁵Nid ydynt hwy mewn helynt fel pobl eraill,

ac nid ydynt hwy'n cael eu poenydio fel eraill.

⁶Am hynny, y mae balchder yn gadwyn am eu gyddfau,

a thrais yn wisg amdanynt.

⁷Y mae eu llygaid yn disgleirio o fraster,

a'u calonnau'n gorlifo o ffolineb.

⁸Y maent yn gwawdio ac yn siarad yn ddichellgar,

yn sôn yn ffroenuchel am ormes.

⁹Gosodant eu genau yn erbyn y nefoedd,

ac y mae eu tafod yn tramwyo'r ddaear.

¹⁰Am hynny, y mae'r bobl yn troi atynt,

ac ni chânt unrhyw fai ynddynt.

¹¹Dywedant, “Sut y mae Duw'n gwybod?

A oes gwybodaeth gan y Goruchaf?”

¹²Edrych, dyma hwy y rhai drygionus—

bob amser mewn esmwythyd ac yn casglu cyfoeth.

¹³Yn gwbl ofer y cedwais fy nghalon yn lân,

a golchi fy nwylo am fy mod yn ddieuog;

¹⁴ar hyd y dydd yr wyf wedi fy mhoenydio,

ac fe'm cosbir bob bore.

¹⁵Pe buaswn wedi dweud, “Fel hyn y siaradaf”,

buaswn wedi bradychu cenhedlaeth dy blant.

¹⁶Ond pan geisiais ddeall hyn,

yr oedd yn rhy anodd i mi,

¹⁷nes imi fynd i gysegr Duw;

yno y gwelais eu diwedd.

¹⁸Yn sicr, yr wyt yn eu gosod ar fannau llithrig,

ac yn gwneud iddynt syrthio i ddistryw.

¹⁹Fe ânt i ddinistr ar amrantiad,

fe'u cipir yn llwyr gan ddychrynfeydd.

²⁰Fel breuddwyd ar ôl ymysgwyd, y maent wedi mynd;

wrth ddeffro fe'u diystyrir fel hunllef.

²¹Pan oedd fy nghalon yn chwerw

a'm coluddion wedi eu trywanu,

²²yr oeddwn yn ddwl a diddeall,

ac yn ymddwyn fel anifail tuag atat.

²³Er hynny, yr wyf gyda thi bob amser;

yr wyt yn cydio yn fy neheulaw.

²⁴Yr wyt yn fy arwain â'th gyngor,

ac yna'n fy nerbyn mewn gogoniant.

²⁵Pwy sydd gennyf yn y nefoedd ond ti?

Ac nid wyf yn dymuno ond tydi ar y ddaear.

²⁶Er i'm calon a'm cnawd ballu,

eto y mae Duw yn gryfder i'm calon ac yn rhan imi am byth.

²⁷Yn wir, fe ddifethir y rhai sy'n bell oddi wrthyt,

a byddi'n dinistrio'r rhai sy'n anffyddlon i ti.

²⁸Ond da i mi yw bod yn agos at Dduw;

yr wyf wedi gwneud yr Arglwydd DDUW yn gysgod i mi,

er mwyn imi fynegi dy ryfeddodau.