Read the Bible

¹O Dduw, rho dy farnedigaeth i'r brenin,

a'th gyfiawnder i fab y brenin.

²Bydded iddo farnu dy bobl yn gyfiawn,

a'th rai anghenus yn gywir.

³Doed y mynyddoedd â heddwch i'r bobl,

a'r bryniau â chyfiawnder.

⁴Bydded iddo amddiffyn achos tlodion y bobl,

a gwaredu'r rhai anghenus,

a dryllio'r gorthrymwr.

⁵Bydded iddo fyw tra bo haul

a chyhyd â'r lleuad, o genhedlaeth i genhedlaeth.

⁶Bydded fel glaw yn disgyn ar gnwd,

ac fel cawodydd yn dyfrhau'r ddaear.

⁷Bydded cyfiawnder yn llwyddo yn ei ddyddiau,

a heddwch yn ffynnu tra bo lleuad.

⁸Bydded iddo lywodraethu o fôr i fôr,

ac o'r Ewffrates hyd derfynau'r ddaear.

⁹Bydded i'w wrthwynebwyr blygu o'i flaen,

ac i'w elynion lyfu'r llwch.

¹⁰Bydded i frenhinoedd Tarsis a'r ynysoedd

ddod ag anrhegion iddo,

ac i frenhinoedd Sheba a Seba

gyflwyno eu teyrnged.

¹¹Bydded i'r holl frenhinoedd ymostwng o'i flaen,

ac i'r holl genhedloedd ei wasanaethu.

¹²Oherwydd y mae'n gwaredu'r anghenus pan lefa,

a'r tlawd pan yw heb gynorthwywr.

¹³Y mae'n tosturio wrth y gwan a'r anghenus,

ac yn gwaredu bywyd y tlodion.

¹⁴Y mae'n achub eu bywyd rhag trais a gorthrwm,

ac y mae eu gwaed yn werthfawr yn ei olwg.

¹⁵Hir oes fo iddo,

a rhodder iddo aur o Sheba;

aed gweddi i fyny ar ei ran yn wastad,

a chaffed ei fendithio bob amser.

¹⁶Bydded digonedd o ŷd yn y wlad,

yn tyfu hyd at bennau'r mynyddoedd;

a bydded ei gnwd yn cynyddu fel Lebanon,

a'i rawn fel gwellt y maes.

¹⁷Bydded ei enw'n aros hyd byth,

ac yn para cyhyd â'r haul;

a'r holl genhedloedd yn cael bendith ynddo

ac yn ei alw'n fendigedig.

¹⁸Bendigedig fyddo'r ARGLWYDD, Duw Israel;

ef yn unig sy'n gwneud rhyfeddodau.

¹⁹Bendigedig fyddo'i enw gogoneddus hyd byth,

a bydded yr holl ddaear yn llawn o'i ogoniant.

Amen ac Amen.

²⁰Diwedd gweddïau Dafydd fab Jesse.