Read the Bible

¹Fy mab, paid ag anghofio fy nghyfarwyddyd;

cadw fy ngorchmynion yn dy gof.

²Oherwydd ychwanegant at nifer dy ddyddiau

a rhoi blynyddoedd o fywyd a llwyddiant.

³Paid â gollwng gafael ar deyrngarwch a ffyddlondeb;

rhwym hwy am dy wddf,

ysgrifenna hwy ar lech dy galon;

⁴a byddi'n ennill ffafr ac enw da

yng ngolwg Duw a dynion.

⁵Ymddiried yn llwyr yn yr ARGLWYDD,

a phaid â dibynnu ar dy ddeall dy hun.

⁶Cydnabydda ef yn dy holl ffyrdd,

bydd ef yn sicr o gadw dy lwybrau'n union.

⁷Paid â bod yn ddoeth yn dy olwg dy hun;

ofna'r ARGLWYDD, a chilia oddi wrth ddrwg.

⁸Bydd hyn yn iechyd i'th gorff,

ac yn faeth i'th esgyrn.

⁹Anrhydedda'r ARGLWYDD â'th gyfoeth,

ac â blaenffrwyth dy holl gynnyrch.

¹⁰Yna bydd dy ysguboriau'n orlawn,

a'th gafnau'n gorlifo gan win.

¹¹Fy mab, paid â diystyru disgyblaeth yr ARGLWYDD,

a phaid â digio wrth ei gerydd;

¹²oherwydd ceryddu'r un a gâr y mae'r ARGLWYDD,

fel tad sy'n hoff o'i blentyn.

¹³Gwyn ei fyd y sawl a gafodd ddoethineb,

a'r un sy'n berchen deall.

¹⁴Y mae mwy o elw ynddi nag mewn arian,

a'i chynnyrch yn well nag aur.

¹⁵Y mae'n fwy gwerthfawr na gemau,

ac nid yw dim a ddymuni yn debyg iddi.

¹⁶Yn ei llaw dde y mae hir oes,

a chyfoeth ac anrhydedd yn ei llaw chwith.

¹⁷Ffyrdd hyfryd yw ei ffyrdd,

a heddwch sydd ar ei holl lwybrau.

¹⁸Y mae'n bren bywyd i'r neb a gydia ynddi,

a dedwydd yw'r rhai sy'n glynu wrthi.

¹⁹Trwy ddoethineb y sylfaenodd yr ARGLWYDD y ddaear,

ac â deall y sicrhaodd y nefoedd;

²⁰trwy ei ddeall y ffrydiodd y dyfnderau,

ac y defnynna'r cymylau wlith.

²¹Fy mab, dal d'afael ar graffter a phwyll;

paid â'u gollwng o'th olwg;

²²byddant yn iechyd i'th enaid,

ac yn addurn am dy wddf.

²³Yna cei gerdded ymlaen heb bryder,

ac ni fagla dy droed.

²⁴Pan eisteddi, ni fyddi'n ofni,

a phan orweddi, bydd dy gwsg yn felys.

²⁵Paid ag ofni rhag unrhyw ddychryn disymwth,

na dinistr y drygionus pan ddaw;

²⁶oherwydd bydd yr ARGLWYDD yn hyder iti,

ac yn cadw dy droed rhag y fagl.

²⁷Paid â gwrthod cymwynas i'r sawl sy'n ei haeddu,

os yw yn dy allu i'w gwneud.

²⁸Paid â dweud wrth dy gymydog, “Tyrd yn d'ôl eto,

ac fe'i rhoddaf iti yfory”,

er ei fod gennyt yn awr.

²⁹Paid â chynllunio drwg yn erbyn dy gymydog,

ac yntau'n ymddiried ynot.

³⁰Paid â chweryla'n ddiachos ag unrhyw un,

ac yntau heb wneud cam â thi.

³¹Paid â chenfigennu wrth ormeswr,

na dewis yr un o'i ffyrdd.

³²Oherwydd y mae'r ARGLWYDD yn ffieiddio'r cyfeiliornus,

ond yn rhannu ei gyfrinach â'r uniawn.

³³Y mae melltith yr ARGLWYDD ar dŷ'r drygionus,

ond y mae'n bendithio trigfa'r cyfiawn.

³⁴Er iddo ddirmygu'r dirmygwyr,

eto fe rydd ffafr i'r gostyngedig.

³⁵Etifedda'r doeth anrhydedd,

ond y ffyliaid bentwr o warth.