Read the Bible

¹Fy mab, os derbynni fy ngeiriau,

a thrysori fy ngorchmynion,

²a gwrando'n astud ar ddoethineb,

a rhoi dy feddwl ar ddeall;

³os gelwi am ddeall,

a chodi dy lais am wybodaeth,

⁴a chwilio amdani fel am arian,

a chloddio amdani fel am drysor—

⁵yna cei ddeall ofn yr ARGLWYDD,

a chael gwybodaeth o Dduw.

⁶Oherwydd yr ARGLWYDD sy'n rhoi doethineb,

ac o'i enau ef y daw gwybodaeth a deall.

⁷Y mae'n trysori craffter i'r uniawn;

y mae'n darian i'r rhai a rodia'n gywir.

⁸Y mae'n diogelu llwybrau cyfiawnder,

ac yn gwarchod ffordd ei ffyddloniaid.

⁹Yna byddi'n deall cyfiawnder a barn,

ac uniondeb a phob ffordd dda;

¹⁰oherwydd bydd doethineb yn dod i'th feddwl,

a deall yn rhoi pleser iti.

¹¹Bydd pwyll yn dy amddiffyn,

a deall yn dy warchod,

¹²ac yn dy gadw rhag ffordd drygioni,

a rhag y rhai sy'n siarad yn dwyllodrus—

¹³y rhai sy'n gadael y ffordd iawn

i rodio yn llwybrau tywyllwch,

¹⁴sy'n cael pleser mewn gwneud drwg

a mwynhad mewn twyll,

¹⁵y rhai y mae eu ffordd yn gam

a'u llwybrau'n droellog.

¹⁶Fe'th geidw oddi wrth y wraig ddieithr,

a rhag y ddynes estron a'i geiriau dengar,

¹⁷sydd wedi gadael cymar ei hieuenctid,

ac wedi anghofio cyfamod ei Duw.

¹⁸Oherwydd y mae ei thŷ yn gwyro at angau,

a'i llwybrau at y cysgodion.

¹⁹Ni ddaw neb sy'n mynd ati yn ei ôl,

ac ni chaiff ailafael ar lwybrau bywyd.

²⁰Felly gofala di rodio yn ffyrdd y da,

a chadw at lwybrau'r cyfiawn.

²¹Oherwydd y rhai cyfiawn a drig yn y tir,

a'r rhai cywir a gaiff aros ynddo;

²²ond torrir y rhai drwg o'r tir,

a diwreiddir y twyllwyr ohono.