Read the Bible

¹Gwrandewch, blant, ar gyfarwyddyd tad,

ac ystyriwch i chwi ddysgu deall.

²Oherwydd yr wyf yn rhoi i chwi hyfforddiant da;

peidiwch â gwrthod fy nysgeidiaeth.

³Bûm innau hefyd yn fab i'm tad,

yn annwyl, ac yn unig blentyn fy mam.

⁴Dysgodd yntau fi, a dweud wrthyf,

“Gosod dy feddwl ar fy ngeiriau;

cadw fy ngorchmynion iti gael byw.

⁵Paid ag anghofio na chilio oddi wrth fy ngeiriau.

Cais ddoethineb, cais ddeall;

⁶paid â'i gadael, a bydd hithau'n dy gadw;

câr hi, a bydd yn d'amddiffyn.

⁷Doethineb yw'r pennaf peth; cais ddoethineb;

â'r cyfan sydd gennyt, cais ddeall.

⁸Meddwl yn uchel ohoni, ac fe'th ddyrchefir ganddi;

fe'th anrhydedda, os cofleidi hi.

⁹Gesyd dorch brydferth ar dy ben,

a rhoi coron anrhydedd iti.”

¹⁰Fy mab, gwrando, a dal ar fy ngeiriau,

ac fe ychwanegir blynyddoedd at dy fywyd.

¹¹Hyfforddais di yn ffordd doethineb;

dysgais iti gerdded llwybrau union.

¹²Pan gerddi, ni rwystrir dy gam,

a phan redi, ni fyddi'n baglu.

¹³Glŷn wrth addysg, a hynny'n ddiollwng;

dal d'afael ynddi, oherwydd hi yw dy fywyd.

¹⁴Paid â dilyn llwybr y drygionus,

na cherdded ffordd pobl ddrwg;

¹⁵gochel hi, paid â'i throedio,

tro oddi wrthi a dos yn dy flaen.

¹⁶Oherwydd ni allant hwy gysgu os na fyddant wedi gwneud drwg;

collant gwsg os na fyddant wedi baglu rhywun.

¹⁷Y maent yn bwyta bara a gafwyd trwy dwyll,

ac yn yfed gwin gormes.

¹⁸Y mae llwybr y cyfiawn fel golau'r wawr,

sy'n cynyddu yn ei lewyrch hyd ganol dydd.

¹⁹Ond y mae ffordd y drygionus fel tywyllwch dudew;

ni wyddant beth sy'n eu baglu.

²⁰Fy mab, rho sylw i'm geiriau,

a gwrando ar fy ymadrodd.

²¹Paid â'u gollwng o'th olwg;

cadw hwy yn dy feddwl;

²²oherwydd y maent yn fywyd i'r un sy'n eu cael,

ac yn iechyd i'w holl gorff.

²³Yn fwy na dim, edrych ar ôl dy feddwl,

oherwydd oddi yno y tardd bywyd.

²⁴Gofala osgoi geiriau twyllodrus,

a chadw draw oddi wrth siarad dichellgar.

²⁵Cadw dy lygaid yn unionsyth,

ac edrych yn syth o'th flaen.

²⁶Rho sylw i lwybr dy droed,

i'th holl ffyrdd fod yn ddiogel.

²⁷Paid â throi i'r dde nac i'r chwith,

a chadw dy droed rhag y drwg.