Read the Bible

¹Canwch utgorn yn Seion,

bloeddiwch ar fy mynydd sanctaidd.

Cryned holl drigolion y wlad

am fod dydd yr ARGLWYDD yn dyfod;

y mae yn agos—

²dydd o dywyllwch ac o gaddug,

dydd o gymylau ac o ddüwch.

Fel cysgod yn ymdaenu dros y mynyddoedd,

wele luoedd mawr a chryf;

ni fu eu bath erioed,

ac ni fydd ar eu hôl ychwaith

am genedlaethau dirifedi.

³Ysa tân o'u blaen

a llysg fflam ar eu hôl.

Y mae'r wlad o'u blaen fel gardd Eden,

ond ar eu hôl yn anialwch diffaith,

ac ni ddianc dim rhagddo.

⁴Y maent yn ymddangos fel ceffylau,

ac yn carlamu fel meirch rhyfel.

⁵Fel torf o gerbydau

neidiant ar bennau'r mynyddoedd;

fel sŵn fflamau tân yn ysu sofl,

fel byddin gref yn barod i ryfel.

⁶Arswyda'r cenhedloedd rhagddynt,

a gwelwa pob wyneb.

⁷Rhuthrant fel milwyr,

dringant y mur fel rhyfelwyr;

cerdda pob un yn ei flaen

heb wyro o'i reng.

⁸Ni wthiant ar draws ei gilydd,

dilyn pob un ei lwybr ei hun;

er y saethau, ymosodant

ac ni ellir eu hatal.

⁹Rhuthrant yn erbyn y ddinas,

rhedant dros ei muriau,

dringant i fyny i'r tai,

ânt i mewn trwy'r ffenestri fel lladron.

¹⁰Ysgwyd y ddaear o'u blaen

a chryna'r nefoedd.

Bydd yr haul a'r lleuad yn tywyllu

a'r sêr yn atal eu goleuni.

¹¹Cwyd yr ARGLWYDD ei lef ar flaen ei fyddin;

y mae ei lu yn fawr iawn,

a'r un sy'n cyflawni ei air yn gryf.

Oherwydd mawr yw dydd yr ARGLWYDD,

ac ofnadwy, a phwy a'i deil?

¹²“Yn awr,” medd yr ARGLWYDD,

“dychwelwch ataf â'ch holl galon,

ag ympryd, wylofain a galar.

¹³Rhwygwch eich calon, nid eich dillad,

a dychwelwch at yr ARGLWYDD eich Duw.”

Graslon a thrugarog yw ef,

araf i ddigio, a mawr ei ffyddlondeb,

ac yn edifar ganddo wneud niwed.

¹⁴Pwy a ŵyr na thry a thosturio,

a gadael bendith ar ei ôl—

bwydoffrwm a diodoffrwm i'r ARGLWYDD eich Duw?

¹⁵Canwch utgorn yn Seion,

cyhoeddwch ympryd,

galwch gymanfa,

¹⁶cynullwch y bobl.

Neilltuwch y gynulleidfa,

cynullwch yr henuriaid,

casglwch y plant,

hyd yn oed y babanod.

Doed y priodfab o'i ystafell

a'r briodferch o'i siambr.

¹⁷Rhwng y porth a'r allor

wyled yr offeiriaid, gweinidogion yr ARGLWYDD,

a dweud, “Arbed dy bobl, O ARGLWYDD.

Paid â gwneud dy etifeddiaeth yn warth

ac yn gyff gwawd ymysg y cenhedloedd.

Pam y dywedir ymysg y bobloedd,

‘Ple mae eu Duw?’ ”

¹⁸Yna aeth yr ARGLWYDD yn eiddigeddus dros ei dir,

a thrugarhau wrth ei bobl.

¹⁹Atebodd yr ARGLWYDD a dweud wrth ei bobl,

“Yr wyf yn anfon i chwi rawn a gwin ac olew

nes eich digoni;

ac ni wnaf chwi eto'n warth ymysg y cenhedloedd.

²⁰Symudaf y gelyn o'r gogledd ymhell oddi wrthych,

a'i yrru i dir sych a diffaith,

â'i reng flaen at fôr y dwyrain

a'i reng ôl at fôr y gorllewin;

bydd ei arogl drwg a'i ddrewdod yn codi,

am iddo ymorchestu.”

²¹Paid ag ofni, ddaear;

bydd lawen a gorfoledda,

oherwydd fe wnaeth yr ARGLWYDD bethau mawrion.

²²Peidiwch ag ofni, anifeiliaid gwylltion,

oherwydd bydd porfeydd yr anialwch yn wyrddlas;

bydd y coed yn dwyn ffrwyth,

a'r coed ffigys a'r gwinwydd yn rhoi eu cnwd yn helaeth.

²³Blant Seion, byddwch lawen,

gorfoleddwch yn yr ARGLWYDD eich Duw;

oherwydd rhydd ef ichwi law cynnar digonol;

fe dywallt y glawogydd ichwi,

y rhai cynnar a'r rhai diweddar fel o'r blaen.

²⁴Bydd y llawr dyrnu yn llawn o ŷd

a'r cafnau yn orlawn o win ac olew.

²⁵“Ad-dalaf ichwi am y blynyddoedd

a ddifaodd y locust ar ei dyfiant a'r locust mawr,

y locust difaol a'r cyw locust,

fy llu mawr, a anfonais i'ch mysg.”

²⁶“Fe fwytewch yn helaeth, nes eich digoni,

a moliannu enw'r ARGLWYDD eich Duw,

a wnaeth ryfeddod â chwi.

Ni wneir fy mhobl yn waradwydd mwyach.

²⁷Cewch wybod fy mod i yng nghanol Israel,

ac mai myfi, yr ARGLWYDD, yw eich Duw, ac nid neb arall.

Ni wneir fy mhobl yn waradwydd mwyach.”

²⁸“Ar ôl hyn

tywalltaf fy ysbryd ar bawb;

bydd eich meibion a'ch merched yn proffwydo,

bydd eich hynafgwyr yn gweld breuddwydion,

a'ch gwŷr ifainc yn cael gweledigaethau.

²⁹Hyd yn oed ar y gweision a'r morynion

fe dywalltaf fy ysbryd yn y dyddiau hynny.”

³⁰“Rhof argoelion yn y nefoedd ac ar y ddaear,

gwaed a thân a cholofnau mwg.

³¹Troir yr haul yn dywyllwch

a'r lleuad yn waed

cyn i ddydd mawr ac ofnadwy yr ARGLWYDD ddod.

³²A bydd pob un sy'n galw ar enw'r ARGLWYDD yn cael ei achub,

oherwydd ar Fynydd Seion ac yn Jerwsalem bydd rhai dihangol,

fel y dywedodd yr ARGLWYDD,

ac ymysg y gwaredigion rai a elwir gan yr ARGLWYDD.”