Read the Bible

¹“Clywch hyn, offeiriaid; gwrandewch, dŷ Israel;

daliwch sylw, dylwyth y brenin. Arnoch chwi y daw'r farn,

am i chwi fod yn fagl yn Mispa ac yn rhwyd wedi ei thaenu ar Tabor;

²gwnaethant bwll Sittim yn ddwfn. Ond fe gosbaf fi bawb ohonynt.

³“Adwaenais Effraim, ac ni chuddiodd Israel ei hun oddi wrthyf;

ond yn awr, O Effraim, fe buteiniaist, ac fe'i halogodd Israel ei hun.

⁴Ni chaniatâ eu gweithredoedd iddynt droi at eu Duw,

am fod ysbryd puteindra o'u mewn, ac nad adwaenant yr ARGLWYDD.”

⁵Y mae balchder Israel yn tystio yn ei erbyn;

syrth Israel ac Effraim trwy eu camwedd,

syrth Jwda hefyd gyda hwy.

⁶Ânt gyda'u defaid a'u gwartheg i geisio'r ARGLWYDD,

ond heb ei gael—ciliodd oddi wrthynt.

⁷Buont dwyllodrus i'r ARGLWYDD, gan iddynt eni plant anghyfreithlon.

Yn awr, fe ddifa'r gorthrymydd eu rhandiroedd.

⁸“Canwch utgorn yn Gibea a thrwmped yn Rama;

rhowch floedd yn Beth-afen: ‘Ar dy ôl di, Benjamin!’

⁹Bydd Effraim yn anrhaith yn nydd y cosbi;

mynegaf yr hyn sydd sicr ymysg llwythau Israel.

¹⁰Y mae tywysogion Jwda fel rhai sy'n symud terfyn;

bwriaf fy llid arnynt fel dyfroedd.

¹¹Gorthrymwyd Effraim, fe'i drylliwyd trwy farn,

oherwydd iddo ddewis dilyn gwagedd.

¹²Byddaf fel dolur crawnllyd i Effraim,

ac fel cancr i dŷ Jwda.

¹³“Pan welodd Effraim ei glefyd a Jwda ei ddoluriau,

aeth Effraim at Asyria ac anfonodd at frenin mawr;

ond ni all ef eich gwella na'ch iacháu o'ch doluriau.

¹⁴Oherwydd yr wyf fi fel llew i Effraim, ac fel llew ifanc i dŷ Jwda;

myfi, ie myfi, a larpiaf, ac af ymaith; cipiaf, ac ni bydd gwaredydd.

¹⁵“Dychwelaf drachefn i'm lle, nes iddynt weld eu bai,

a chwilio amdanaf, a'm ceisio yn eu hadfyd.”