Read the Bible

¹Clywch air yr ARGLWYDD, blant Israel.

Y mae gan yr ARGLWYDD achos yn erbyn trigolion y tir,

am nad oes ffyddlondeb, cariad na gwybodaeth o Dduw yn y tir,

²ond tyngu a chelwydda, lladd a lladrata,

godinebu a threisio, a lladd yn dilyn lladd.

³Am hynny, galara'r wlad, nycha'i holl drigolion;

dygir ymaith anifeiliaid y maes,

adar yr awyr hefyd a physgod y môr.

⁴“Peidied neb ag ymryson, ac na chyhudded neb;

y mae fy achos yn dy erbyn di, offeiriad.

⁵Yr wyt yn baglu liw dydd,

a syrth y proffwyd hefyd gyda thi yn y nos.

Dinistriaf dy fam;

⁶difethir fy mhobl o eisiau gwybodaeth;

am i ti wrthod gwybodaeth y gwrthodaf di yn offeiriad imi;

am i ti anghofio cyfraith dy Dduw yr anghofiaf finnau dy blant.

⁷“Fel yr amlhânt, mwy y pechant yn f'erbyn;

trof eu gogoniant yn warth.

⁸Bwytânt bechod fy mhobl,

ac estyn eu safn at eu drygioni.

⁹Bydd y bobl fel yr offeiriad;

fe'u cosbaf am eu ffyrdd a dial arnynt am eu gweithredoedd.

¹⁰Bwytânt, ond heb eu digoni,

puteiniant, ond heb amlhau,

am iddynt ddiystyru yr ARGLWYDD.

¹¹“Y mae puteindra, gwin a gwin newydd

yn dwyn ymaith y deall.

¹²Y mae fy mhobl yn ymofyn â phren, a'u gwialen sy'n eu cyfarwyddo;

oherwydd ysbryd puteindra a'u camarweiniodd,

troesant mewn puteindra oddi wrth eu Duw.

¹³Y maent yn aberthu ar bennau'r mynyddoedd,

ac yn offrymu ar y bryniau,

o dan y dderwen, y boplysen a'r terebinth

am fod eu cysgod yn dda.

“Am hynny, y mae eich merched yn puteinio

a'ch merched-yng-nghyfraith yn godinebu.

¹⁴Ni chosbaf eich merched pan buteiniant,

na'ch merched-yng-nghyfraith pan odinebant,

oherwydd y mae'r dynion yn troi at buteiniaid

ac yn aberthu gyda phuteiniaid y cysegr.

Pobl heb ddeall, fe'u difethir.

¹⁵“Er i ti buteinio, Israel, na fydded Jwda'n euog.

Peidiwch â mynd i Gilgal, nac i fyny i Beth-afen,

a pheidiwch â thyngu, ‘Cyn wired â bod yr ARGLWYDD yn fyw.’

¹⁶Fel heffer anhydrin y mae Israel yn anodd ei thrin;

a all yr ARGLWYDD yn awr eu bwydo fel oen mewn porfa?

¹⁷“Glynodd Effraim wrth eilunod; gadawer iddo.

¹⁸Cwmni o feddwon wedi ymollwng i buteindra!

Syrthiodd ei arweinwyr mewn cariad â gwarth.

¹⁹Clymodd y gwynt hwy yn ei adenydd,

a chywilyddiant oherwydd eu haberthau.”