Salmow 111
1Gormelewgh an Arloedh.
My a ras dhe'n Arloedh a leun golonn,
yn kowethas an re ewnhynsek hag y'n kuntelles.
2Meur yw oberow an Arloedh,
hwilys gans oll an re a lowenha ynna.
3Y ober yw leun a wordhyans hag enor,
ha'y ewnder a dhur bys vykken.
4Ev a wrug dh'y oberow marthys bos kovhes;
grassyes ha truedhek yw an Arloedh.
5Ev re ros sosten dhe'n re a'n own;
ev a berth kov a'y gevambos bynitha.
6Ev re dherivas dh'y bobel galloes y wriansow,
rag may rollo dhedha ertach an kenedhlow.
7Gwriansow y dhiwleuv yw gwirder ha gwirvreus;
oll y arghadowyow yw sur.
8Fastys yns i bys vykken ha bynnari,
ha gwrys yn gwirder hag ewnder.
9Ev re dhannvonas daspren dh'y bobel;
ev re worhemmynnis y gevambos bynitha;
sans hag ownys yw y hanow.
10Own an Arloedh yw an dalleth a furneth;
yma skians da dhe oll an re a wra hemma;
y wormola a dhur bys vykken.