Salmow 112
1Gormelewgh an Arloedh.
Gwynnvys an gour a berth own a'n Arloedh,
a lowenha yn feur yn y worhemmynnow.
2Y has a vydh galloesek war an nor;
henedh an re ewnhynsek a vydh benniges.
3Kevoeth ha rychys a vydh yn y ji ev,
ha'y ewnder a dhur bys vykken.
4Dhe'n re ewnhynsek y sev golow y'n tewlder;
ev yw grassyes ha truedhek ha gwiryon.
5Dremas yw grassyes hag ev a re kendon;
ev a dhyght y negysyow gans breus.
6Rag ny wra ev trebuchya bynitha;
an den gwiryon a vydh synsys yn kov bys vykken.
7Ny berth own a dhrog nowodhow;
sad yw y golonn, hag ev a drest y'n Arloedh.
8Fast yw y golonn, ha ny berth own,
erna wello y vynnas war y eskerens.
9Ev re rannas, ev re ros dhe'n voghosogyon,
ha'y ewnder a dhur bys vykken;
y gorn a vydh drehevys yn enor.
10An tebelwas a'n wel, hag yw serrys;
ev a skrynk ha teudhi dhe-ves;
mynnas an debeles a dhe goll.