Read the Bible

¹Ena Yesu a gewsis dhe'n routhow ha dh'y dhyskyblon ²ow leverel, ‘An skribys ha'n Fariseow re esedhas war esedh Moyses. ³Rakhenna gwrewgh ha gwithewgh oll an taklow a leverons dhywgh, saw herwydh aga gweythresow na wrewgh: rag i a gews mes ny wrons. ⁴I a gelm beghyow poes ha kales dhe berthi ha'ga gorra war dhiwskoedh tus, mes i aga honan ny vynnons aga remova gans aga bys. ⁵Oll aga oberow i a wra rag bos gwelys gans tus; rag i a ledanha aga fylakteriow ha hirhe pilennow aga gwisk. ⁶I a gar an penn-esedhow yn kevewiow ha'n penn-esedhow y'n synagys, ⁷ha salusyansow y'n marghasow, ha bos gelwys Rabbi gans tus. ⁸Mes hwi, na bedhewgh gelwys Rabbi; rag onan yw agas dyskador hag oll hwi yw breder. ⁹Ha hwi na wrewgh gelwel denvyth y'n nor agas tas, rag onan yw agas Tas nevek. ¹⁰Ha na byth moy na vedhewgh gelwys dyskadoryon, rag onan yw agas dyskador, an Krist. ¹¹An moyha ahanowgh a vydh agas servont. ¹²Neb a omughelha a vydh uvelhes, ha neb a omuvelha a vydh ughelhes.

¹³‘Go-hwi, skribys ha Fariseow, fekloryon, rag hwi a dhege gwlaskor nev erbynn tus; rag nyns ewgh agas honan a-bervedh ynni na ny esowgh dhe vones a-bervedh an re a vynn entra.

¹⁴‘Go-hwi, skribys ha Fariseow, fekloryon, rag hwi a lenk chiow gwedhwesow, hag yn fayntys hwi a wrewgh pysadow hir; rakhenna y kevowgh breus dhe voy tynn. ¹⁵Go-hwi, skribys ha Fariseow, fekloryon, rag hwi a dremen dres mor ha tir dhe gavoes unn dyskybel nowydh, ha pan y'n kevir, hwi a'n gwra mab ifarn dewblek gweth agesowgh hwi agas honan.

¹⁶‘Go-hwi, kevarwoedhoryon dhall neb a lever, “Seul a wrello ti re'n tempel, ny amont mann, mes seul a wrello ti re owr an tempel, ev yw kelmys.” ¹⁷Tus fol ha dall, pyneyl ytho yw an moyha, an owr po an tempel a sanshas an owr? ¹⁸Ha, “Seul a wrello ti re'n alter, ny amont mann, mes seul a wrello ti re'n offrynn eus warnedhi, ev yw kelmys.” ¹⁹Tus dhall, pyneyl ytho yw an moyha, an offrynn po an alter a sanhas an offrynn bos sakrys? ²⁰Rag neb a wra ti re'n alter, a de re'n alter ha re bup-tra eus warnedhi; ²¹ha neb a de re'n tempel a de re'n tempel ha re neb a drig ynno, ²²ha neb a de re'n nev, a de re dron Duw ha re neb yw esedhys warnodho.

²³‘Go-hwi, skribys ha Fariseow, fekloryon, rag hwi a wra degevi menta ha fenogel gew ha kumin, ha gasa dhe goll taklow poessa an lagha, ewnder ha tregeredh ha fydh; an re ma y koedhsa dhywgh aga gul heb dispresya an re na. ²⁴Kevarwoedhoryon dhall, usi ow kroedra gwibesenn ha lenki kowrvargh!

²⁵‘Go-hwi, skribys ha Fariseow, fekloryon, rag hwi a lanha tu a-ves an hanaf ha'n skudell, mes an tu a-bervedh yw leun a grefni ha fowt omrewl. ²⁶Ty Farise dall, kyns oll glanha tu a-bervedh an hanaf may fo glan an tu a-ves anodho.

²⁷‘Go-hwi, skribys ha Fariseow, fekloryon, rag hwi yw haval dhe vedhow yw gwynnhes gans lim, teg aga semlans war-ves, mes war-ji yth yns leun a eskern tus varow hag a bub plosedhes. ²⁸Yndellma ynwedh hwi yw gwiryon agas semlans war-ves a-wel dhe dus, mes war-ji yth owgh leun a falsuri ha fara dilagha.

²⁹‘Go-hwi, skribys ha Fariseow, fekloryon, rag hwi a dhrehav bedhow an brofoesi ha tekhe meyn kov an re wiryon, ³⁰ha leverel, “A kwrellen ni bewa yn dydhyow agan tasow, ny vien kevrennek gansa ow skoellya goes an brofoesi.” ³¹Yndella y tustuniowgh er agas pynn agas honan, hwi dhe vos mebyon an re a ladhas an brofoesi. ³²Kollenwewgh ytho musur agas tasow. ³³Hwi serf! Hwi askorr nadres! Fatell yllowgh diank dhiworth breus ifarn? ³⁴Rakhenna, otta, my a dhannvon dhywgh profoesi ha tus fur ha skribys; re anedha hwi a's ladh ha'ga krowsya, ha skorjya re anedha a wrewgh yn agas synagys ha'ga helghya a sita dhe sita; ³⁵may teffo warnowgh an goes gwiryon oll a veu skoellys war an bys, a-dhiworth goes Abel an gwiryon bys yn goes Zakaria mab Baraghia, neb a ledhsowgh ynter an tempel ha'n alter. ³⁶Yn hwir y lavarav dhywgh, oll an taklow ma a dheu war an henedh ma.

³⁷‘Yerusalem, Yerusalem neb a ladh an brofoesi ha labydha an re yw dannvenys dhis! Peskweyth y yeunis vy kuntell dha fleghes war-barth, kepar dell guntell yar hy yerigow yn-dann hy eskelli, mes hwi ny vynnsowgh. ³⁸Awotta, agas chi yw gesys dhywgh hwi, ynyal. ³⁹Rag my a lever dhywgh, na'm gwelowgh alemma rag, bys pan leverowgh, “Benniges yw neb a dheu yn hanow an Arloedh.” ’