Read the Bible

¹Ena Yesu eth yn-mes a'n tempel, hag yth esa ow mos yn-rag, pan dheuth y dhyskyblon dhe dhiskwedhes dhodho drehevyansow an tempel. ²Ev a worthybis ha leverel dhedha, ‘A ny welowgh hwi oll hemma? Yn hwir y lavarav dhywgh, ny vydh gesys omma men war ven na vydh terrys dhe'n dor.’

³Pan ova esedhys war an menydh Oliv, y dhyskyblon a dheuth dhodho yn priva ha leverel, ‘Lavar dhyn, p'eur hwyrvydh oll an taklow ma ha py tokyn vydh a'th tevedhyans ha diwedh an oes?’ ⁴Yesu a worthybis ha leverel dhedha, ‘Bedhewgh war na wrello denvyth agas toella; ⁵rag lies a dheu y'm hanow vy ha leverel, “My yw an Krist”, hag i a wra toella lies. ⁶Hware hwi a glewvydh a vreselyow ha derivas a vreselyow; gwaytyewgh na berthewgh own, rag res yw henna dhe hwarvos, mes ny vydh hwath an diwedh. ⁷Rag kenedhel a sev erbynn kenedhel, ha gwlaskor erbynn gwlaskor, hag y hwyrvydh divoetter ha dorgrysyow yn divers tylleryow. ⁸Mes dalleth gloesow yw henna oll.

⁹‘Ena i a'gas delirv dhe dorment ha'gas ladha ha hwi a vydh kesys gans oll an kenedhlow, a-barth ow hanow vy. ¹⁰Hag ena lies huni a wra koedha dhe-ves ha trayta ha kasa an eyl y gila. ¹¹Lies profoes fals a sev, ha toella lies; ¹²ha rag bos tebelwrians ow moghhe, kerensa lies huni a wra yeynhe. ¹³Mes neb a dhur bys yn diwedh, ev a vydh selwys. ¹⁴Ha'n aweyl ma a'n wlaskor a vydh pregewthys yn oll an bys yn dustuni dhe oll an kenedhlow, hag ena y teu an diwedh.

¹⁵‘Pan welowgh ytho pyth kasadow an difeythter, menegys gans Daniel an profoes, ow sevel y'n tyller sans (gwres an redyer konvedhes), ¹⁶ena fies dhe'n menydhyow an re a drig yn Yudi; ¹⁷neb usi war do an chi na wres diyskynna rag kyrghes neppyth yn-mes a'y ji; ¹⁸ha neb eus y'n gwel na wres dehweles arta rag kyrghes y vantell. ¹⁹Ha go-i an re gans flogh y'n dorr, ha neb a re an vronn y'n dydhyow na. ²⁰Pysewgh na vo agas fo yn gwav po y'n Sabot. ²¹Rag y'n prys na y fydh anken meur, a'n par na hwarva a-dhia dhalleth an norvys bys y'n jydh hedhyw, na nevra ny vydh. ²²Ha mar ny ve an dydhyow na gotthaho, ny via kig vyth selwys; mes rag an re dhewisys, an dydhyow na a vydh kothhes. ²³Ena mar lever nebonan dhywgh, “Ottomma an Krist”, po “Ottena ev”, na'n krysewgh. ²⁴Rag fals Kristow ha fals profoesi a sev ow kul toknys bras ha marthusyon, rag toella, mara kyllir, an re dhewisys. ²⁵Otta, my re'gas gwarnyas a-rag dorn. ²⁶Mar leverons dhywgh ytho, “Ottava y'n gwylvos”, nag ewgh dhe-ves; po “Ottava y'n chambouryow a-bervedh”, na grysewgh henna. ²⁷Rag kepar dell dheu an lughesenn yn-mes a'n howldrevel ha golowi bys y'n howlsedhes, yndella y fydh devedhyans Mab an den. ²⁸Pyle pynag a vo an korf marow, ena yth omguntell an eryon.

²⁹‘A-dhihwans war-lergh galar an dydhyow na

³⁰Hag ena yth omdhiskwa tokyn Mab an den yn nev, hag ena pub loeth a'n bys a wra kyni, hag i a wel “Mab an den ow tos war gommol an nev” gans galloes ha golewder meur; ³¹hag ev a dhannvon y eledh gans son bras a hirgorn, hag i a guntell war-barth y bobel dhewisys, yn-mes a'n peswar gwyns dhiworth a'n eyl penn a'n nevow dh'y gila.

³²‘Dyskewgh parabolenn dhiworth an figbrenn; kettell vo y skorrenn medhel, ha gorra del yn-mes, hwi a woer bos yn ogas an hav; ³³yndella hwi ynwedh, pan welowgh oll an taklow ma, hwi a woer ev dhe vos ogas, orth an darasow. ³⁴Yn hwir y lavarav dhywgh, ny dremen an henedh ma erna vo oll an taklow ma gwrys. ³⁵Nev ha nor a dremen dhe-ves, mes ow geryow vy, yn surredi ny dremenons dhe-ves.

³⁶‘Mes a-dro dhe'n jydh na ha'n eur, ny woer denvyth, naneyl eledh an nevow, na'n Mab, saw unnsel an Tas. ³⁷Rag kepar dell vedha hi yn dydhyow Noy, yndella y fydh devedhyans Mab an den. ³⁸Rag kepar dell esens, y'n dydhyow na kyns an liv, ow tybri hag owth eva, ow temmedhi hag ow ri yn demmedhyans, bys y'n jydh mayth eth Noy a-ji dhe'n argh, ³⁹ha ny wodhyens travyth bys pan dheuth an liv hag a's skubas dhe-ves yn kettep penn: yn kettella y fydh devedhyans Mab an den. ⁴⁰Ena y fydh dewdhen y'n gwel, an eyl a vydh kemmerys ha'y gila gesys; ⁴¹diw venyn ow melyas orth an velin, an eyl a vydh kemmerys ha gesys hy ben. ⁴²Gwrewgh goelyas ytho rag ny wodhowgh py dydh y teu agas Arloedh. ⁴³Mes godhvydhewgh hemma: mar kodhve mester an chi yn py goel y to an lader, y fia ow koelyas ha ny wrussa gasa y ji dhe vos terrys. ⁴⁴Rakhenna, bedhewgh hwi ynwedh parys, rag ny dhesevowgh an eur may teu Mab an den.

⁴⁵‘Piw ytho yw an kethwas lel ha fur may ros an mester dhodho charj a'y deylu rag ri dhedha aga boes yn prys ewn? ⁴⁶Gwynnvys an kethwas na, a wra y arloedh y gavoes ow kul yndella pan dheffo. ⁴⁷Yn hwir y lavarav dhywgh, ev a re dhodho an charj a oll y byth. ⁴⁸Mes mars lavar an kethwas drog na yn y golonn, “Delatya a wra ow mester y dhevedhyans”, ⁴⁹hag ena dalleth gweskel y geswesyon, ha dybri hag eva gans an pennow-medhow, ⁵⁰dos a wra mester an kethwas na yn jydh na wayt, hag yn eur na woer. ⁵¹Ev a wra y gwartona hag ordena dhodho le gans an fekloryon. Ena y fydh oelva ha skrinva dyns.