Read the Bible

¹Yesu a worthybis, ow kewsel dhedha arta dre barabolennow, ow leverel, ²‘Gwlaskor nev yw hevelebys dhe unn myghtern a wrug goel demmedhyans dh'y vab. ³Hag ev a dhannvonas y gethwesyon dhe dhri an dus gelwys dhe'n demmedhyans, mes i ny vynnens dos. ⁴Arta ev a dhannvonas kethwesyon erell, ow leverel, “Derivewgh dhe'n dus elwys, Awotta, my re bareusis ow hevewi, ledhys yw ow oghen ha'm lodhnow peskys; pup-tra oll yw parys; dewgh dhe'n demmedhyans.” ⁵Mes i a skonyas a wul henna ha mones yn-kerdh y hwrussons, onan dh'y bras, hag arall dh'y negys. ⁶Ha'n re erell a dhalghennas y gethwesyon hag a's tebeldhyghtyas ha'ga ladha. ⁷An myghtern a sorras hag a dhannvonas y luyow dhe dhiswul an dhenledhysi na hag a loskas aga sita. ⁸Ena yn-medh ev dh'y gethwesyon, “An demmedhyans yw parys, mes nyns o gwiw an dus elwys. ⁹Kewgh ytho dhe'n fordhow-meur ha myns a dhyerbynnowgh, gelwewgh i dhe'n demmedhyans.” ¹⁰Hag yth eth an gethwesyon na yn-mes dhe'n fordhow ha kuntell oll an dus a wrussons aga dyerbynna, an re dhrog ha da kekeffrys; ha hel an demmedhyans a veu lenwys a westoryon.

¹¹‘Ha'n myghtern, pan dheuth a-ji dhe vires orth an westoryon, a verkyas unn den ena nag esa warnodho gwisk demmedhyans, ¹²hag yn-medh ev dhodho, “Koweth, fatell dheuthys omma heb gwisk demmedhyans?” Ha tewel a wrug an den. ¹³Ena yn-medh an myghtern dhe'n servysi, “Kelmewgh y dhewdroes ha'y dhiwla ha tewlewgh ev y'n tewolgow pella. Ena y fydh oelva ha skrinva dyns” ¹⁴Rag lies yw gelwys, mes boghes yw an re yw dewisys.’

¹⁵Ena an Fariseow a omdennas ha kemmeres kusul fatell wrellens y vaglenna yn y gows. ¹⁶Hag i a dhannvonas dhodho aga dyskyblon gans an Herodyanys, ow leverel, ‘A Dhyskador, ni a woer dha vos gwir, ow tyski fordh Duw yn gwiryonedh, ha ny'th teur mann a dhenvyth rag ny virydh orth semlans tus. ¹⁷Lavar dhyn ytho pyth yw dha vreus: yw lafyl ri trubyt dhe Sesar, po nag yw?’ ¹⁸Mes Yesu, ow kodhvos aga droktra, a leveris, ‘Prag y'm prevowgh vy, hwi fekloryon? ¹⁹Diskwedhewgh dhymm mona an trubyt.’ Hag i a dhros dhodho denarius. ²⁰Hag ev a leveris dhedha, ‘Dhe biw yw an imaj ma ha'n pennskrifa?’ ²¹Yn-medhons dhodho, ‘Sesar.’ Ena yn-medh ev dhedha, ‘Attelewgh ytho dhe Sesar an taklow yw dhe Sesar, ha dhe Dhuw an taklow yw dhe Dhuw.’ ²²Henna pan y'n klewsons marth a's teva, hag i a'n gasas ha mos dhe-ves. ²³Y'n keth jydh na, y teuth dhodho Sadukeow neb a lever nag eus dasserghyans, hag i a wovynnas orto ²⁴ow leverel, ‘A Dhyskador, Moyses a leveris, Mar merow neb den heb bos dhodho fleghes, y hwra y vroder demmedhi y wreg ev ha maga askorr dh'y vroder. ²⁵Yth esa yn agan mysk seyth broder; ha'n kynsa, wosa demmedhi, a verwis heb gasa askorr, hag a asas y wreg dh'y vroder. ²⁶Y'n keth vaner an nessa, ha'n tressa bys y'n seythves. ²⁷Yn tiwettha, oll an venyn a verwis. ²⁸Y'n dasserghyans ytho piw a'n seyth a vydh hi an wreg dhodho, rag i oll a's teva hi?’ ²⁹Yesu a worthybis ha leverel dhedha, ‘Kammdybi a wrewgh, drefenn na wodhowgh naneyl an skryptors na galloes Duw. ³⁰Rag y'n dasserghyans ny dhemmedhons, ha nyns yns i res yn demmedhyans, mes yth yns i avel eledh Duw yn nev. ³¹Hag a-dro dhe dhasserghyans an re varow, a ny redsowgh an dra derivys dhywgh gans Duw, ow leverel, ³²“My yw Duw Abraham ha Duw Ysak ha Duw Yakob”? Nyns yw ev Duw an re varow saw a'n re vew.’ ³³Ha pan glewas an routhow henna, marth a's teva a'y dhyskas.

³⁴An Fariseow wosa klewes ev dhe wul dhe'n Sadukeow tewel, a omguntellas war-barth, ³⁵hag onan anedha, styryer an lagha, a wovynnas orto, orth y brevi, ³⁶‘A Dhyskador, pandra yw an brassa gorhemmynn y'n lagha?’ ³⁷Yn-medh ev dhodho, ‘ “Ty a wra kara an Arloedh dha Dhuw gans oll dha golonn ha gans oll dha enev ha gans oll dha vrys.” ³⁸Hemm yw an brassa ha'n kynsa gorhemmynn. ³⁹Ha'n nessa yw haval dhodho, “Ty a wra kara dha gentrevek avelos ty dha honan.” ⁴⁰War a'n dhew worhemmynn ma yma ow kregi oll an lagha ha'n brofoesi.’

⁴¹Pan veu an Fariseow omguntellys war-barth, Yesu a wovynnas orta ⁴²ow leverel, ‘Pandr'a dybowgh hwi a-dro dhe'n Krist? Piw dhodho yw ev mab?’ Yn-medhons dhodho, ‘Dhe Davydh.’ ⁴³Yn-medh ev dhedha, ‘Fatell ytho y hwra Davydh y'n Spyrys y elwel Arloedh, ow leverel,

⁴⁵Ytho Davydh mara'n gelow “Arloedh”, fatell yw ev y vab?’ ⁴⁶Ha ny ylli denvyth leverel ger dhodho yn gorthyp, na ny vedhas denvyth a-dhia'n jydh na govynn orto namoy.