Read the Bible

¹Ev a leveris dhedha, ‘Yn hwir y lavarav dhywgh, bos rann an re usi ow sevel omma, na vydhons ow tastya mernans, kyns i dhe weles gwlaskor Duw devedhys gans nerth.’

²Wosa hwegh dydh, Yesu a gemmeras ganso Peder, ha Jamys ha Yowann, ha'ga hembronk yn-bann yn menydh ughel, yn priva, aga honan; hag y feu treusfigurys a-ragdha. ³Y dhillas a dhewynnyas yn pur wynn, yn fordh ma na ylli troghyer vyth war an nor aga hanna. ⁴Hag yth omdhiskwedhas dhedha Elias gans Moyses, hag yth esens ow keskewsel gans Yesu. ⁵Peder a worthybis ha leverel dhe Yesu, ‘A Rabbi, da yw ni dhe vos omma; gwren ni gul teyr skovva, onan dhiso jy, hag onan dhe Moyses, hag onan dhe Elias.’ ⁶Rag ny wodhva pandra dhe leverel, rag own bras a's teva. ⁷Hag y teuth kommolenn ha tewlel skeus warnedha; ha lev a dheuth yn-mes a'n gommolenn, ‘Hemm yw ow Mab karadow: klewewgh ev.’ ⁸A-dhesempis, wosa i dhe vires a-derdro, ny welsons denvyth namoy, saw unnsel Yesu gansa.

⁹Pan esens ow tos yn-nans a'n menydh, ev a erghis dhedha ma na wrellens derivas dhe dhenvyth an taklow a welsens, bys pan ve Mab an den dasserghys a'n re varow. ¹⁰I a withas an lavar dhedha aga honan, ow tisputya pandra ve styr dasserghyans a'n re varow. ¹¹Hag i a wovynnas orto ow leverel, ‘Prag y lever an skribys bos res dhe Elias dos kynsa?’ ¹²Mes ev a leveris dhedha, ‘Elias dhe wir a dheu kynsa ha restorya pub tra; fatell ytho yw skrifys a Vab an den ev dhe wodhevel lies tra ha bos dispresys? ¹³Mes my a lever dhywgh, bos Elias dhe wir devedhys, hag i re wrug dhodho pypynag oll a vynnens, kepar dell yw skrifys anodho.’

¹⁴Pan dheuthons dhe'n dhyskyblon, i a welas routh veur yn aga hyrghynn, ha skribys ow tisputya orta. ¹⁵A-dhesempis oll an routh, pan y'n gwelsons, o sowdhenys meur, ha poenya a wrussons bys dhodho ha'y salusi. ¹⁶Ev a wovynnas orta, ‘Pandr'a dhisputyowgh hwi orta?’ ¹⁷Nebonan a'n routh a worthybis dhodho, ‘A Dhyskador, my re dhros dhis ow mab, hag ynno spyrys avlavar, ¹⁸ha plepynag y talghenn ynno, ev a'n deghes dhe'n dor, hag ev a ewyn, ha deskerni gans y dhyns ha dos ha bos diwedhyn; ha my a leveris dhe'th tyskyblon ma'n towllens yn-mes, ha ny allsons.’ ¹⁹Mes ev a worthybis dhedha ha leverel, ‘A henedh diskryjyk, pes termyn y fydhav vy genowgh? Pes termyn y hwrav agas perthi? Drewgh e dhymm.’ ²⁰Hag i a'n dros dhodho. Pan y'n gwelas, a-dhesempis an spyrys a ros dhodho shora hag ev a goedhas dhe'n dor, ha rolya a-dro, owth ewyni. ²¹Yesu a wovynnas orth y das, ‘Pes termyn yth yw a-ban dheuth hemma dhodho?’ Ev a leveris, ‘A-dhia y flogholeth; ²²ha lieskweyth ev re'n tewlis hag yn tan hag yn dowrow rag y dhistrui; mes ty, mar kyllydh gul neppyth, kemmer truedh ahanan, ha gweres dhyn ni.’ ²³Yesu a leveris dhodho, ‘Mar kyllydh? Pup-tra yw possybyl dhe neb a grysso.’ ²⁴Hag a-dhesempis tas an flogh a grias gans dagrow ha leverel, ‘Arloedh, my a grys: ty gweres ow diskryjyans.’ ²⁵Mes pan welas Yesu routh dhe boenya war-barth, ev a rebukyas an spyrys avlan, ow leverel dhodho, ‘Ty spyrys avlavar ha bodhar, my a ergh dhis, deus yn-mes anodho, ha na wra mos ynno namoy.’ ²⁶An spyrys a grias, a ros dhodho lies shora, hag a dheuth yn-mes; y feu avel onan marow, may hwrug lies leverel, ‘Marow ywa.’ ²⁷Mes Yesu a'n kemmeras er an leuv ha'y dhrehevel, hag ev a sevis yn-bann. ²⁸Ha pan ova devedhys y'n chi, y dhyskyblon a wovynnas orto yn priva ‘Prag na yllsyn ni y dewlel yn-mes?’ ²⁹Hag ev a leveris dhedha, ‘Kammenn na yll an eghenn ma dos yn-mes marnas dre bysi ha penys.’

³⁰I eth alena ha tremena dre Alile; hag ev ny vynna denvyth dhe wodhvos henna. ³¹Rag ev a dhyski y dhyskyblon ha leverel dhedha, ‘Mab an den a vydh daskorrys yntra diwla tus, hag y hwrons y ladha, ha wosa bos ledhys, ev a dhassergh wosa trydydh.’ ³²Mes ny gonvedhens an lavar, hag own a's teva a wovynn orto.

³³Ena ev a dheuth dhe Kapernaum; ha pan esa y'n chi ev a wovynnas orta, ‘Pyth esewgh orth y dhisputya war an fordh?’ ³⁴Mes i a dewis; rag war an fordh i re bia ow tisputya yntredha piw a vedha moyha. ³⁵Ev a esedhas ha gelwel an dewdhek ha leverel dhedha, ‘Mara mynn neb den bos kynsa, ev a vydh an diwettha oll, ha servont dhe bub den oll.’ ³⁶Hag ev a gemmeras flogh ha'y settya yn aga mysk, ha wosa y gemmeres ev yn y dhiwvregh, ev a leveris dhedha, ³⁷‘Piwpynag a dhegemmerro onan a'n fleghes a'n par ma yn ow hanow vy, a'm degemmer vy, ha piwpynag a'm degemmerro, ny'm degemmer vy, saw ev neb a'm dannvonas.’

³⁸Yowann a leveris dhodho, ‘A Dhyskador, ni a welas nebonan ow tewlel yn-mes dywolow y'th hanow jy; ha ni a'n lettyas drefenn na wre agan holya.’ ³⁹Mes Yesu a leveris, ‘Na'n lettyewgh ev; rag nyns eus denvyth a wra marthusyon yn ow hanow vy hag a yll a verr spys kewsel drog ahanav. ⁴⁰Rag neb na vo er agan pynn ni, ragon ni yth yw. ⁴¹Rag piwpynag a rollo dhywgh hanafas a dhowr dhe eva y'm hanow vy, drefenn agas bos dhe Grist, yn hwir y lavarav dhywgh, kammenn na gyll y wober.

⁴²‘Ha piwpynag a wrello dhe onan a'n re vyghan ma trebuchya, neb a grys ynnov vy, gwell via dhodho mar pe kregys men-melin meur a-dro dh'y gonna, ha'y vos tewlys y'n mor. ⁴³Ha'th leuv mar kwra dhis trebuchya, trogh hi dhe-ves; gwell yw dhis entra mans dhe vewnans, ages mos yn ifarn ha genes diw leuv, y'n tan nevra na vydh difeudhys, ⁴⁴le na verow aga fryv i, ha ny vydh an tan difeudhys. ⁴⁵Ha'th troes mar kwra dhis trebuchya, trogh ev dhe-m v es; gwell yw dhis entra dhe vewnans evredhek, ages bos tewlys yn ifarn, ha genes dew droes, y'n tan nevra na vydh difeudhys, ⁴⁶le na verow aga fryv i, ha'n tan ny vydh difeudhys. ⁴⁷Ha'th lagas mar kwra dha sklandra, tenn ev yn-mes; gwell yw dhis entra dhe wlaskor Duw unnlagasek, ages bos tewlys yn tan ifarn ha genes dew lagas, ⁴⁸le na verow aga fryv, ha'n tan ny vydh difeudhys.

⁴⁹‘Rag pub den a vydh sellys gans tan, ha pub sakrifis a vydh sellys gans hoelan. ⁵⁰Hoelan yw da; mes mar teu an hoelan ha bos heb blas, gans pandra y fydh ev sawrys? Bedhes genowgh hoelan ynnowgh agas honan, ha bedhes genowgh kres, an eyl gans y gila.’