Read the Bible

¹Ev a sevis alena ha dos bys yn oryon Yudi ha dres an Yordan; ha routhow a dheuth war-barth dhodho arta, ha kepar dell o y us, ev a's dyski arta. ²Fariseow a dheuth ha govynn orto, orth y brevi, mars o lafyl, gour dhe dhidhemmedhi y wreg? ³Ev a worthybis ha leverel dhedha, ‘Pandr'a worhemmynnis dhywgh Moyses?’ ⁴Yn-medhons, ‘Moyses a ros kummyas dhe skrifa skrifedh a dhidhemmedhyans ha'y gorra hi dhe-ves.’ ⁵Mes Yesu a leveris dhedha, ‘Rag kaletter agas kolonn ev a skrifas dhywgh an gorhemmynn ma. ⁶Mes dhiworth dalleth an kreasyon “Duw a's gwrug gorreydh ha benynreydh.” ⁷“Rakhenna y hwra den gasa y das ha'y vamm, ha glena orth y wreg, ⁸ha'n dhew a dheu ha bos unn kig;” ma nag yns namoy dew, saw unn kig. ⁹An pyth a junyas Duw, ytho, den na wres y ranna.’

¹⁰Hag arta y'n chi, y dhyskyblon a wovynnas orto a-dro dhe hemma. ¹¹Yn-medh ev dhedha, ‘Neb a dhidhmettho y wreg, hag a dhemmettho onan arall, a wra avoutri er hy fynn. ¹²Ha gwreg pan dhidhemmettho hy gour ha demmedhi onan arall, hi a wra avoutri.’

¹³I a dhegi dhodho fleghesigow, may hwrella aga thochya; ha'n dhyskyblon a geredhis an re a's dug. ¹⁴Mes pan welas Yesu henna, ev a veu serrys, hag a leveris dhedha, ‘Gesewgh an fleghesigow dhe dhos dhymmo vy, ha na wrewgh aga lettya, rag dhe re a'n par ma yw gwlaskor Duw. ¹⁵Yn hwir y lavarav dhywgh, piwpynag na dhegemmerro gwlaskor Duw avel fleghik, ev ny enter dhedhi mann.’ ¹⁶Hag ev a's kemmeras yn y dhiwvregh, gorra y dhiwla warnedha, ha'ga benniga.

¹⁷Pan esa ev ow mos yn-kerdh war an fordh, nebonan a boenyas dhodho ha koedha war benn-dewlin a-ragdho, ha govynn orto, ‘A Dhyskador mas, pandr'a wrav may hylliv erita bewnans heb diwedh?’ ¹⁸Yesu a leveris dhodho, ‘Prag y'm gelwydh mas? Mas nyns yw denvyth saw unnsel Duw. ¹⁹Ty a woer an gorhemmynnow, “Na wra avoutri, Na wra ladha, Na wra ladra, Na wra don fals dhustuni, Na wra toella, Enor dha das ha'th vamm.” ’ ²⁰Yn-medh ev dhodho, ‘A Dhyskador, my re withas oll an re ma a-dhia'm yowynkneth.’ ²¹Mes Yesu, ow mires poran warnodho, a'n karas, hag a leveris dhodho, ‘Unn dra a fyll dhis: ke yn-rag, gwerth pup-tra eus dhis, ha ro dhe'n voghosogyon, ha ty a'fydh tresor yn nev; ha deus, hol vy.’ ²²Mes keudh a'n jeva orth an lavar na hag yth eth galarek dhe-ves, rag yth esa dhodho meur a byth an bys.

²³Ow mires a-derdro, Yesu a leveris dh'y dhyskyblon, ‘Assa vydh kales dhe'n re a's tevo rychys entra dhe wlaskor Duw!’ ²⁴Marth o gans y dhyskyblon a'y lavarow. Mes Yesu a worthybis arta ha leverel dhedha, ‘A fleghes, ass yw kales dhe'n re a drest yn rychys dhe wlaskor Duw! ²⁵Esya yw, kowrvargh dhe dremena dre graw naswydh, es dell yw dhe dhen rych entra dhe wlaskor Duw.’ ²⁶Marth a's teva dhe voy, ow leverel an eyl dh'y gila, ‘Piw, ytho, a yll bos selwys?’ ²⁷Yesu a viras orta ha leverel, ‘Henn yw dres galloes tus, mes gans Duw ken yw; gans Duw pub tra a yll bos gwrys.’

²⁸Peder a dhallathas leverel dhodho, ‘Otta, ni re wrug gasa pup-tra, ha'th holya jy.’ ²⁹Yn-medh Yesu, ‘Yn hwir y lavarav dhywgh, nyns eus denvyth, neb re asas chi, po breder, po hwerydh, po mamm, po tas, po gwreg, po fleghes, po tiryow a-barth dhymmo vy hag a-barth dhe'n aweyl, ³⁰na'n jevydh kanskemmys lemmyn y'n termyn ma: chiow, ha breder, ha hwerydh, ha mammow, ha fleghes, ha tiryow, gans persekutyansow; hag y'n oes a dheu, bewnans heb diwedh. ³¹Mes lies yw kynsa a vydh diwettha; ha diwettha, kynsa.’

³²Hag yth esens war an fordh ow mos yn-bann dhe Yerusalem; yth esa Yesu ow mos a-dheragdha, ha marth o gansa; hag own a's teva an re esa owth holya. Ev a gemmeras an dewdhek arta a-denewen, hag a dhallathas derivas dhedha pana daklow a vedha ow hwarvos dhodho: ³³‘Otta, mos a wren yn-bann dhe Yerusalem, ha Mab an den a vydh daskorrys dhe'n bennoferysi ha dhe'n skribys; i a wra y dhampnya dhe'n mernans, ha'y dhaskorr dhe'n Jentilys; ³⁴hag i a wra y skornya, ha trewa warnodho, ha'y skorjya, ha'y ladha; ha wosa trydydh ev a dhassergh.’

³⁵Jamys ha Yowann, mebyon Zebede, a dheuth dhodho ow leverel dhodho, ‘A Dhyskador, ni a vynn may hwrylli ragon pypynag a wovynnyn ni.’ ³⁶Yn-medh ev dhedha, ‘Pandr'a vynnowgh my dhe wul ragowgh?’ ³⁷I a leveris dhodho, ‘Gront dhyn may hyllyn esedha, an eyl a'n barth dhyghow dhis, ha'y gila a'n barth kledh, yn dha wolewder.’ ³⁸Mes Yesu a leveris dhedha, ‘Ny wodhowgh pandr'a wovynnowgh. A yllowgh hwi eva a'n hanaf a evav vy? Po bos besydhys gans an besydh mayth o'ma besydhys?’ ³⁹I a leveris dhodho, ‘Gyllyn.’ Hag yn-medh Yesu dhedha, ‘Hwi a wra eva a'n hanaf a evav vy, ha gans an besydh mayth o'ma besydhys hwi a vydh besydhys, ⁴⁰mes esedha a'n barth dhyghow dhymm hag a'n barth kledh, henna nyns yw dhymm dhe ri; mes y fydh res dhe'n re mayth yw dhedha darbarys.’

⁴¹Ha'n deg, pan glewsons, a dhallathas bos serrys orth Jamys ha Yowann. ⁴²Mes Yesu a's gelwis dhodho hag a leveris dhedha, ‘Hwi a woer, an re yw aswonnys avel rewloryon an Jentilys a wra lordya warnedha; ha'ga brasyon a's teves galloes warnedha. ⁴³Mes yndella ny vydh yntredhowgh hwi; mes ahanowgh neb a vynno bos meur a vydh agas servont, ⁴⁴hag ahanowgh neb a vynno bos kynsa, ev a vydh kethwas dhe bub den oll; ⁴⁵rag Mab an den ny dheuth may halla bos servys, mes rag servya, ha dhe ri y vewnans yn daspren rag lies.’

⁴⁶I a dheuth dhe Yeriko. Ha pan esa ev ow mos yn-mes a Yeriko gans y dhyskyblon ha routh veur, Bartimeus mab Timeus, beggyer dall, o esedhys ryb an fordh. ⁴⁷Pan glewas bos henna Yesu a Nazareth, ev a dhallathas garma ha leverel, ‘Yesu, Mab Davydh, kemmer truedh ahanav.’ ⁴⁸Ha lies a'n koskas, may tawa; mes ev a armas hwath dhe greffa, ‘Mab Davydh, kemmer truedh ahanav.’ ⁴⁹Yesu a sevis ha leverel, ‘Gelwewgh ev’, hag i a elwis an den dall, ow leverel dhodho, ‘Gwellha dha jer, sav yn-bann; ymava orth dha elwel.’ ⁵⁰Hag ev, ow tewlel y vantell dhiwarnodho, a lammas yn-bann hag a dheuth dhe Yesu. ⁵¹Yesu a worthybis dhodho ha leverel, ‘Pandr'a vynnydh orthiv y wul dhis?’ Ha'n dall a worthybis dhodho, ‘Ow Rabbi, may hwellen vy arta.’ ⁵²Yesu a leveris dhodho, ‘Ke yn-rag; dha fydh re'th sawyas.’ Hag a-dhesempis ev a gavas y weles, hag a'n holyas y'n hyns.