Read the Bible

¹Pan dheuthons ogas dhe Yerusalem, bys yn Bethfage ha Bethani, dhe'n menydh Oliv, ev a dhannvonas dew a'y dhyskyblon ²ha leverel dhedha, ‘Ewgh y'n wig usi a-ragowgh, hag ow mos ynno, a-dhesempis hwi a gyv ebel yn kelmys, warnodho bythkweth na wrug denvyth esedha; gwrewgh y dhigelmi, ha'y gyrghes. ³Ha mar lever dhywgh neb den, “Prag y hwrewgh hwi hemma?” leverewgh, “Yma dhe'n Arloedh edhomm anodho, ha hware ev a'n dastannvon omma.” ’ ⁴I eth yn-kerdh ha kavoes ebel yn kelmys ogas dhe dharas a-ves y'n stret; hag i a'n digolmas. ⁵Re a'n dus esa ow sevel ena a leveris dhedha, ‘Pandr'a wrewgh hwi, ha hwi ow tigelmi an ebel?’ ⁶I a gewsis orta kepar dell lavarsa Yesu, hag i a asas dhedha mos. ⁷Ytho i a dhros an ebel dhe Yesu, hag a tewlel aga mantelli warnodho; hag ev a esedhas warnodho. ⁸Lies a lesas aga mantelli war an fordh; hag erell a lesas skorrennow delyek a dorrsens y'n gwelyow. ⁹Ha'n re esa ow mos a-rag, ha'n re esa ow siwya, a armas,

¹¹Hag ev a dheuth dhe Yerusalem, dhe'n tempel; ha wosa ev dhe vires a-derdro war bup-tra, ha'n eur lemmyn diwedhes, ev eth yn-mes dhe Bethani gans an dewdhek.

¹²Ternos, pan esens ow tos a Bethani, yth esa nown dhodho. ¹³Ow kweles figbrenn a-bell ha dhodho del, ev a dheuth dhe weles mar kaffa neppyth warnodho, ha pan dheuth dhodho, ny gavas travyth saw del; rag nyns esa termyn figys. ¹⁴Yesu a worthybis ha leverel dhodho, ‘Denvyth byth na dhybres frut ahanas alemma rag, bys vykken.’ Ha'y dhyskyblon a glewas.

¹⁵I a dheuth dhe Yerusalem. Devedhys a-ji dhe'n tempel, ev a dhallathas tewlel yn-mes an re esa ow kwertha hag ow prena y'n tempel, hag ev a dhomhwelis moesow an arghansoryon, hag esedhow an re esa ow kwertha kelemmi; ¹⁶ha ny vynna godhav denvyth dhe dhoen tra vytholl der an tempel. ¹⁷Yth esa ev ow tyski, hag ow leverel dhedha, ‘A nyns yw skrifys,

Mes hwi re'n gwrug fow ladron.’ ¹⁸An bennoferysi ha'n skribys a glewas, hag i a hwila fatell allens y dhistrui; rag i a's teva own anodho drefenn bos marth gans oll an routh a'y dhyskas. ¹⁹Pan o devedhys gorthugher, ev eth yn-mes a'n sita.

²⁰Myttin a-varr, hag i ow tremena, i a welas an figbrenn desyghys dhiworth an gwreydhyow. ²¹Ha Peder, ow perthi kov, a leveris dhodho, ‘A Rabbi, awotta'n figbrenn a wrussys y villiga yw desyghys.’ ²²Yesu a worthybis ha leverel dhedha, ‘Bedhes genowgh fydh yn Duw. ²³Yn hwir y lavarav dhywgh, piwpynag a lavarro dhe'n menydh ma, “Ty bydh kemmerys yn-bann, ha bydh tewlys y'n mor,” ha na dhouttyo yn y golonn, mes a grysso y hwyrvydh an pyth a gews, ev a'n kyv. ²⁴Rakhenna my a lever dhywgh, pypynag a hwilowgh pan bysowgh, krysewgh y dhegemmeres, ha hwi a'n kyv.

²⁵‘Ha peskweyth may seffowgh dhe bysi, gevewgh hwi, mara'gas beus travyth erbynn nebonan, rag may haffo agas Tas usi y'n nevow dhywgh hwi agas kammweythresow. ²⁶Mes hwi mar ny wrewgh hwi gava, agas Tas usi y'n nevow ny wra gava agas kammweythresow hwi.’

²⁷I a dheuth arta dhe Yerusalem; ha pan esa ev ow kerdhes y'n tempel, an bennoferysi ha'n skribys ha'n henavogyon a dheuth dhodho, ²⁸ha leverel dhodho, ‘Py awtorita dredho y hwre'ta an taklow ma, po piw a ros dhis an awtorita ma dh'aga gul?’ ²⁹Yesu a leveris dhedha, ‘My a wovynn orthowgh unn dra; gorthybewgh hwi dhymm, ha my a lever dhywgh py awtorita dredho y hwrav an taklow ma. ³⁰Besydh Yowann, ova a nev, po a dus? Gorthybewgh dhymmo.’ ³¹Hag i a resnas yntredha, ow leverel, ‘Mar leveryn “A nev,” ev a lever, “Ytho prag na wrussowgh y grysi?” ³²Mes mar kwren ni leverel, “A dus,” pandra ytho?’ Own a's teva a'n routh; rag pub den a synsi Yowann dhe vos profoes yn tevri. ³³Ytho i a worthybis ha leverel dhe Yesu, ‘Ny wodhon.’ Ha Yesu a leveris dhedha, ‘Na byth moy ny lavarav vy dhywgh py awtorita dredho y hwrav vy an taklow ma.’