Read the Bible

¹Ev a dhallathas kewsel orta dre barabolennow: ‘Unn den a blansas gwinlann, gorra ke a-dro dhedhi, palas pytt dhe'n winwask, drehevel tour, hy gobrena dhe diogyon, hag ena vyajya yn-kerdh. ²Yn termyn gwiw ev a dhannvonas kethwas dhe'n diogyon, may tegemmerra a-dhiworth an diogyon rann a drevas an winlann. ³Mes i a'n dalghennas, ha'y gronkya, ha'y dhannvon dhe-ves gwag y dhiwla. ⁴Arta ev a dhannvonas dhedha kethwas arall; hag i a'n kronkyas war an penn, ha'y dhespitya. ⁵Ev a dhannvonas onan arall; ha henna i a'n ladhas; ha lower arall, ow kronkya re hag ow ladha re. ⁶Yth esa dhodho hwath unn mab karadow; ev a'n dannvonas dhedha wortiwedh, ow leverel, “Gul vri a'm mab i a wra.” ⁷Mes an diogyon na a leveris an eyl dh'y gila, “Hemm yw an her; deun, ledhyn ev, ha'n ertach a vydh dhyn ni.” ⁸Hag i a'n kemmeras ha'y ladha, ha'y dewlel yn-mes a'n winlann. ⁹Ytho pandr'a wra arloedh an winlann? Dos a wra ha distrui an diogyon, ha ri an winlann dhe re erell. ¹⁰A ny redsowgh hwi an skryptor ma:

¹²Hag i a hwila settya dalghenn ynno, mes own a's teva a'n routh, rag i a wodhva ev dhe gewsel an barabolenn er aga fynn i, hag i a'n gasas, ha mos dhe-ves.

¹³I a dhannvonas dhodho re a'n Fariseow ha'n Herodianys, may hallens y vaglenna yn y gows. ¹⁴Pan dheuthons yn-medhons dhodho, ‘A Dhyskador, ni a woer ty dhe vos gwir, ha ny'th teur mann a dhenvyth; rag ny virydh orth fas tus, mes ty a dhysk fordh Duw yn gwiryonedh. Yw lafyl ri trubyt dhe Sesar, po nag yw? A ren ni po na ren?’ ¹⁵Mes ev, owth aswonn aga falsuri, a leveris dhedha, ‘Prag y'm prevowgh vy? Drewgh dhymm denarius, may hallav hy gweles.’ ¹⁶Ytho i a's dros, hag yn-medh ev dhedha, ‘Dhe biw yw an imaj ma ha'n pennskrifa?’ Yn-medhons dhodho, ‘Sesar.’ ¹⁷Yesu leveris dhedha, ‘Attelewgh dhe Sesar an taklow yw dhe Sesar ha dhe Dhuw an taklow yw dhe Dhuw.’ Ha marth a's tevo anodho.

¹⁸Y teuth dhodho Sadukeow, neb a lever nag eus dasserghyans, hag yth esens ow kovynn orto, ow leverel, ¹⁹‘A Dhyskador, Moyses a skrifas ragon, Mar merow broder neb den, ha gasa gwreg a-dhelergh, heb gasa flogh, y vroder a dal kemmeres an wreg, ha maga askorr dh'y vroder. ²⁰Yth esa seyth broder; ha'n kynsa a gemmeras gwreg, ha pan verwis, ny asas askorr. ²¹Ha'n nessa a's kemmeras, hag y ferwis heb gasa askorr; ha'n tressa kekeffrys; ²²ha'n seyth, ny assons askorr. Yn tiwettha oll, an wreg a verwis y'n keth vaner. ²³Y'n dasserghyans, pan sevons, dhe biw anedha a vydh hi yn gwreg? Rag an seyth a's kemmeras yn gwreg.’

²⁴Yn-medh Yesu dhedha, ‘A nyns yw drefenn na wodhowgh naneyl an skryptors, na galloes Duw, y kammdybowgh hwi yn hemma? ²⁵Rag i pan dhasserghons a'n re varow, ny dhemmedhons na ny vydhons demmedhys, mes yth yns i avel eledh y'n nevow. ²⁶Hag a-dro dhe'n re varow, i dhe vos drehevys, a ny redsowgh yn lyver Moyses, a-dro dhe'n spernenn, fatell gewsis Duw dhodho, ow leverel, My yw Duw Abraham, ha Duw Ysak, ha Duw Yakob? ²⁷Nyns yw ev Duw an re varow, saw a'n re vew; yn feur hwi a gammdyp!’

²⁸Onan a'n skribys a dheuth yn-rag, ha wosa goslowes orta ow tisputya war-barth, hag ow kweles ev dhe worthybi dhedha yn ta, ev a wovynnas orto, ‘Py yw an kynsa gorhemmynn oll?’ ²⁹Yesu a worthybis, ‘An kynsa yw, “Klew, A Ysrael; an Arloedh agan Duw yw unn Arloedh; ³⁰ha ty a wra kara an Arloedh dhe Dhuw gans oll dha golonn, gans oll dha enev, gans oll dha vrys, ha gans oll dha nerth.” Hemm yw an kynsa gorhemmynn. ³¹An nessa yw hemma, “Ty a wra kara dha gentrevek kepar dell omgerydh dha honan.” Nyns eus gorhemmynn arall brassa es an re ma.’ ³²An skriba a leveris dhodho, ‘Yn ta, a Dhyskador, ty re gewsis an gwiryonedh, “Onan yma, ha nyns eus arall marnas ev”, ³³hag “y gara gans oll an golonn, ha gans oll an skians, ha gans oll an enev, ha gans oll an nerth”, ha “kara y gentrevek kepar hag ev y honan”, hemm yw moy ages oll an offrynnow kowlleskys ha'n sakrifisow.’ ³⁴Ha Yesu, ow kweles ev dhe worthybi yn fur, a leveris dhodho, ‘Nyns osta pell a-dhiworth gwlaskor Duw.’ Ha ny lavasa denvyth govynn travyth orto na fella.

³⁵Yesu a worthybis ha leverel, hag ev ow tyski y'n tempel, ‘Fatell yw, y lever an skribys Krist dhe vos mab Davydh? ³⁶Davydh y honan a gewsis der an Spyrys Sans,

³⁷Yma Davydh y honan orth y elwel Arloedh; ha fatell, ytho, ymava mab dhodho?’ Ha'n routh veur a woslowi orto yn lowen.

³⁸Ev a leveri yn y dhyskas, ‘Bedhewgh war a'n skribys, neb a gar kerdhes a-dro yn gwiskas hir, hag a gar salusyansow y'n marghasow, ³⁹ha penn-esedhow y'n synagys, ha leow a vri y'n kevewiow, ⁴⁰neb a lenk chiow an gwedhwesow, hag a wra pysadow hir yn fayntys; an re ma a's tevydh dhe voy dampnyans.’

⁴¹Ev a esedhas a-dal an argh, hag a weli fatell esa an routh ow tewlel mona y'n argh. Ha lies den rych a dewli meur. ⁴²Hag unn wedhwes voghosek a dheuth, ha hi a dewlis ynni dew vita, henn yw ferdhynn. ⁴³Hag ev a elwis dhodho y dhyskyblon ha leverel dhedha, ‘Yn hwir y lavarav dhywgh, y hwrug an wedhwes voghosek ma tewlel moy ages oll an re erell esa ow tewlel y'n argh. ⁴⁴Rag i oll a wrug tewlel ynni a'ga lanwes, mes hi a'y edhomm a wrug tewlel myns a's teva, oll hy fygans.’