Read the Bible

¹Y'n dydhyow na, pan esa routh vras arta heb travyth dhe dhybri, ev a elwis y dhyskyblon dhodho, ha leverel dhedha, ²‘Truedh a'm beus a'n routh, drefenn i dhe vos genev nans yw tri dydh, ha nyns eus gansa travyth dhe dhybri; ³ha mara's dannvonav dhe-ves heb boes dh'aga chiow, i a glamder ryb an fordh, rag y teuth re anedha a bellder.’ ⁴Ha'y dhyskyblon a'n gorthybis, ‘A-ble haller kavoes bara lowr ragdha omma y'n gwylvos?’ ⁵Ev a wovynnas orta, ‘Py lies torth eus genowgh?’ hag yn-medhons, ‘Seyth.’ ⁶Ev a erghis dhe'n routh esedha war an dor; hag ow kemmeres an seyth torth, ev a ros gras, ha'ga therri ha'ga ri dh'y dhyskyblon dhe settya a-ragdha; hag i a's settyas a-rag an routh. ⁷Hag yth esa gansa nebes puskes byghan; ha wosa aga benniga, ev a erghis i ynwedh dhe vos settys a-ragdha. ⁸Ytho i a dhybris, ha lenwys vons; hag a'n brewyon o gesys i a gemmeras yn-bann seyth kanstellas. ⁹An re a dhybris o a-dro dhe beswar mil. Ena ev a's dannvonas yn-kerdh. ¹⁰Hware ev eth a-bervedh y'n skath gans y dhyskyblon, ha dos dhe rannvro Dalmanutha.

¹¹An Fariseow a dheuth yn-mes, ha dalleth disputya orto, ow kovynn orto neb tokyn a nev, rag y brevi. ¹²Owth hanasa down yn y spyrys, yn-medh ev, ‘Prag y hwila an henedh ma tokyn? Yn hwir y lavarav dhywgh, ny vydh res tokyn dhe'n henedh ma.’ ¹³Hag ev a's gasas, hag ow mos a-bervedh y'n skath arta, ev a omdennas dhe'n tu arall.

¹⁴I a wrussa ankevi dri bara, ha nyns esa gansa y'n skath saw unn dorth. ¹⁵Ev a erghis dhedha, ‘Omwithewgh, bedhewgh war a woell an Fariseow hag a woell Herod.’ ¹⁶Hag i a dhadhlas yntredha aga honan, ow leverel, ‘Hemm yw drefenn nag eus genen bara.’ ¹⁷Ow kodhvos henna, yn-medh ev dhedha, ‘Prag y hwrewgh hwi resna, rag nag eus genowgh bara? A ny wrewgh hwi gweles hwath, na konvedhes? Eus dhywgh kolonn kaleshes? ¹⁸Eus dhywgh dewlagas, ha ny welowgh? Ha dhywgh diwskovarn, ha ny glewowgh? Hag a ny wrewgh perthi kov? ¹⁹Pan derris an seyth torth rag an pymp mil, py lies kowel leun a vrewyon a gemmersowgh yn-bann?’ Yn-medhons dhodho, ‘Dewdhek.’ ²⁰‘Ha'n seyth rag an peswar mil, py lies kanstellas leun a vrewyon a gemmersowgh yn-bann?’ Yn-medhons, ‘Seyth.’ ²¹Ev a leveris dhedha, ‘Hwath ny wrewgh hwi konvedhes?’

²²Ena i a dheuth dhe Bethsaida; hag i a dhros dhodho den dall, ha'y bysi ma'n tocchya. ²³Ev a gemmeras an den dall er an leuv, ha'y hembronk mes a'n dre; wosa ev dhe drewa war y dhewlagas, ha gorra y dhiwla warnodho, ev a wovynnas orto, ‘A welydh tra?’ ²⁴Ev a viras war-vann ha leverel, ‘My a wel tus, avel gwydh, ow kerdhes.’ ²⁵Ena ev a worras y dhiwla arta war y dhewlagas, hag ev a welas yn kler; restorys veu, hag ev a welas pup-tra yn tiblans. ²⁶Ev a'n dannvonas yn-kerdh dh'y ji, ow leverel, ‘Na wra mos hwath a-bervedh y'n dre, ha na wra y dherivas dhe dhenvyth y'n dre.’

²⁷Yesu eth yn-mes, ha'y dhyskyblon, yn trevow Sesarea Filippi: ha war an fordh ev a wovynnas orth y dhyskyblon, ow leverel dhedha, ‘Piw y lever tus, my dhe vos?’ ²⁸I a worthybis, ‘Yowann Besydhyer, ha re erell Elias, mes re erell, onan a'n brofoesi.’ ²⁹Hag ev a wovynnas orta, ‘Mes piw y leverowgh hwi, my dhe vos?’ Peder a worthybis ha leverel dhodho, ‘Ty yw an Krist.’ ³⁰Hag ev a erghis dhedha na gowssens anodho orth denvyth.

³¹Ena ev a dhallathas aga dyski, bos res dhe Vab an den godhevel lies tra, ha bos deneghys gans an henavogyon ha gans an bennoferysi ha'n skribys, ha bos ledhys, ha wosa trydydh dasserghi. ³²Ev a gewsi an lavar na apert. Ha Peder a'n kemmeras dhe denewen, ha dalleth y geredhi. ³³Mes ow treylya ha mires war y dhyskyblon, ev a geredhis Peder, ow leverel, ‘Ke a-dryv dhymm, Satnas; rag ny brederydh an taklow a Dhuw, mes an taklow a dus.’

³⁴Wosa gelwel an routh dhodho gans y dhyskyblon, ev a leveris dhedha, ‘Neb a vynno holya war ow lergh, gwres ev omnagha y honan, ha kemmeres yn-bann y grows, ha'm holya vy. ³⁵Rag piwpynag a vynno sawya y vewnans, a'n kyll; mes piwpynag a gollo y vewnans a-barth dhymmo vy ha'n aweyl, ev a wra y sawya. ³⁶Pana les a vydh dhe dhen, mar kwra ev gwaynya oll an bys, ha kelli y enev? ³⁷Rag pandr'a wra den y ri yn attal rag y enev? ³⁸Piwpynag, ytho, a'n jeffo meth ahanav vy ha'm lavarow y'n henedh ma, leun a avoutri ha pegh, anodho ev ynwedh Mab an den a'n jevydh meth pan dheffo yn glori y Das gans an eledh sans.’