Read the Bible

²Y'n dydhyow diwettha

menydh chi an Arloedh

a vydh fastys avel penn an menydhyow;

hag y fydh drehevys yn-bann dres an breow,

hag oll an kenedhlow a dheu dhodho yn fros.

³Poblow pals a dheu ha leverel,

‘Dewgh, ha deun ni yn-bann dhe venydh an Arloedh,

dhe ji Duw Yakob;

hag ev a dhysk dhyn y fordhow,

ha ni a gerdh yn y hynsyow.’

Rag yn-mes a Sion y teu lagha,

ha ger an Arloedh dhiworth Yerusalem.

⁴Ev a vydh breusydh ynter an kenedhlow,

ha mayner rag lies pobel.

I a wysk aga kledhedhyow yn soghyow,

ha'ga guwow yn higow-skethra.

Ny dhrehav kenedhel kledha erbynn kenedhel,

ha ny dhyskons gwerrya namoy.

⁵Chi Yakob,

dewgh, kerdhyn ni

yn golow an Arloedh.

⁶Rag ty re forsakyas dha bobel,

chi Yakob,

drefenn i dhe vos leun a hudoryon dhiworth an howldrevel,

hag a goelyogyon, kepar ha'n Filistysi,

hag i a shak diwleuv gans fleghes estrenyon.

⁷Y wlas yw lenwys a arghans hag owr,

ha nyns eus diwedh dh'y dresoryow.

Y wlas yw lenwys a vergh;

ha nyns eus diwedh dh'y jarettow.

⁸Y wlas yw lenwys a idolys;

i a wordh gweyth aga diwla,

an pyth re wrug aga bysies.

⁹Den yw uvelhes,

ha gour yw iselhes –

na wra gava dhedha.

¹⁰Deus y'n garrek,

omgel y'n doust

dhiworth fas euth an Arloedh

ha splannder y veuredh!

¹¹Dewlagas valghder den a vydh uvelhes,

ha goeth tus a vydh iselhes,

ha'n Arloedh unnsel a vydh ughelhes y'n jydh na.

¹²Rag yma dhe Arloedh an luyow dydh

erbynn pubonan yw goethus hag ughel,

hag erbynn pubonan yw eksaltys,

hag i a vydh uvelhes;

¹³hag erbynn oll sedres Lebanon

yw ughel hag eksaltys,

ha war oll derow Bashan;

¹⁴hag erbynn oll an menydhyow ughel,

hag erbynn oll an vronnow drehevys yn-bann;

¹⁵hag erbynn pub tour ughel,

hag erbynn bub fos kerys;

¹⁶hag erbynn oll gorholyon Tarshish,

hag erbynn oll an lestri teg.

¹⁷Ena goeth den a vydh uvelhes,

ha balghder tus a vydh iselhes;

an Arloedh unnsel a vydh ughelhes y'n jydh na.

¹⁸An idolys a dremen glan dhe-ves.

¹⁹I a dheu yn fowys y'n kerrek,

hag yn pansow y'n dor,

dhiworth fas euth an Arloedh

ha splannder y veuredh,

pan sev dhe ownekhe an norvys.

²⁰Y'n jydh na den a dewl

y idolys a arghans ha'y idolys a owr,

an pyth a wrug pubonan dhodho y honan dhe wordhya,

dhe'n godhow ha dhe'n ughsommyses,

²¹dhe vones yn fowys y'n kerrek

hag yn folsyow an kleger

dhiworth fas euth an Arloedh

ha splannder y veuredh,

pan sev dhe ownekhe an norvys.

²²Na wra mellya gans den

may ma y anall yn y dhewfrik:

rag pandr'a amont ev?