Read the Bible

²Klew a nev, ha goslow a norvys;

rag an Arloedh re gewsis:

My a vagas mebyon ha'ga meythrin,

mes i a rebellyas er ow fynn.

³Ojyon a woer y berghennek

hag asen presep y vester,

mes Ysrael ny woer,

ow fobel ny gonvedh.

⁴Go-i, kenedhel neb a begh,

pobel yw poes gans anewnder,

has drogoberoryon,

mebyon legrys.

I re asas an Arloedh,

ha fia Sans Ysrael

ow treylya war-dhelergh.

⁵Prag y fydhowgh gweskys hwath moy?

Prag y pesyowgh yn rebellyans?

An penn dien yw klav,

oll an golonn yw klamderek.

⁶A wodhen an troes bys an penn,

nyns eus yeghes ynno,

mes brewyon, kreythennow,

ha goliow podrek;

ny vons glanhes na lystennys

na medhelhes gans oyl.

⁷Agas tir yw ynyal,

agas sitys leskys gans tan;

yn agas lok

estrenyon a dhevor agas tir,

hag ynyal yw, kepar dell ve domhwelys gans estrenyon.

⁸Myrgh Sion yw gesys

avel skovva yn gwinlann,

avel krow yn gwel kukumbrow,

avel sita yn-dann worheas.

⁹Mar ny assa dhyn Arloedh an luyow

remenant byghan,

y tothyen ni ha bos avel Sodom,

y fien haval dhe Gomorra.

¹⁰Klewewgh ger an Arloedh,

hwi rewloryon Sodom;

goslowewgh orth lagha agan Duw,

pobel Gomorra.

¹¹Pandra yw dhymm sakrifisow pals?

yn-medh an Arloedh.

Gwalghys ov a offrynnow leskys a hordhes

ha blonek lodhnow peskys.

Nyns eus dhymm delit yn goes terewi,

nag eyn gorow, na gever.

¹²Pan dheuthewgh dhymm dhe vos gwelys a-ragov,

piw a wovynnas dhiworthis

trettya ow klosyow?

¹³Na besyewgh dri offrynnow koeg!

Ynkys yw kasadow dhymm.

An loer nowydh ha'n Sabot, gelwel kuntellesow solem –

ny allav perthi kammhynseth yn kuntellesow solem.

¹⁴Agas loeryow nowydh ha'gas goelyow apoyntys

ow enev a gas.

Begh yns i warnav;

skwith ov vy a'ga doen.

¹⁵Pan ystynnowgh agas diwleuv,

my a gudh ow dewlagas ragowgh;

ynwedh pan wrewgh meur a bysadow,

ny woslowav vy.

Agas diwleuv yw leun a woes.

¹⁶Omwolghewgh, omlanhewgh;

kemmerewgh agas drog wriansow

yn-mes a'm gwel;

hedhewgh a gammwul,

¹⁷dyskewgh gul da,

hwilewgh gwirvreus,

ewnewgh an arwasker,

rewgh gwirvreus dhe'n omdhivas,

defendyewgh an wedhwes.

¹⁸Dewgh, ha resnyn ni war-barth,

yn-medh an Arloedh.

Kyn fons agas peghosow kepar ha kogh,

y fydhons mar wynn avel an ergh;

kyn fons mar rudh avel purpur,

y fydhons kepar ha gwlan.

¹⁹Mars yw agas bodh ha mar pydhowgh gostyth,

hwi a dheber dader an tir;

²⁰mes mar skonyowgh ha rebellya,

hwi a vydh dybrys gans an kledha;

rag ganow an Arloedh re gewsis.

dos ha bos hora!

Hi neb a veu leun a wirvreus,

ewnder a ostya ynni,

mes lemmyn denledhysi.

²²Dha arghans eth ha bos atal,

dha win yw kemmyskys gans dowr.

²³Dha bennsevigyon yw penn-kales,

ha keskowetha ladron;

pubonan anedha a gar falswober

ha helghya rohow.

Ny rons gwirvreus dhe'n omdhivas,

ha ken an wedhwes ny dheu a-ragdha.

²⁴Rakhenna y lever an Arloedh, Arloedh an luyow, an Galloesek a Ysrael:

Ogh, my a vydh konfortys drefenn ow envi,

ha tyli dial war ow eskerens.

²⁵My a dreyl ow leuv er dha bynn;

my a burj dhe-ves dha blosedhes kepar ha gans lisiw,

ha kemmeres yn-mes oll dha atal.

²⁶My a wra restorya dha vreusysi kepar ha kyns,

ha dha gonseloryon kepar hag y'n dalleth.

Wosa hemma ty a vydh henwys sita an ewnder,

an sita len.

²⁷Sion a vydh dasprenys dre wirvreus,

ha'n re anedha a dhehwel, der ewnder.

²⁸An re a rebell ha'n beghadoryon a vydh distruys war-barth,

ha'n re a forsak an Arloedh a dhe goll.

²⁹Rag i a vydh methek a'n derow

re dhesirsowgh;

hag i a vydh shamys dre'n lowarthyow

re dhewissowgh.

³⁰Rag hwi a vydh avel derebinthenn

gwedhrys hy del,

hag avel lowarth heb dowr.

³¹An den krev a vydh avel garrow lin,

ha'y ober avel gwryghonenn;

aga dew a lesk war-barth

heb denvyth dh'aga difeudhi.