Amos 3
Ger erbynn Ysrael
1Klewewgh an ger ma a leveris an Arloedh er agas pynn, mebyon Ysrael, erbynn an teylu oll a wrugavy y dhri yn-mes a bow Ejyp, ow leverel:
2Hwi unnsel a aswonnis vy
yn-mes a oll teyluyow an nor;
rakhenna my a wra agas kessydhya
rag agas drogoberow oll.
3A yll dew kerdhes war-barth
marnas i a sett an prys?
4A wra lew usa y'n koes,
pan nag eus preydh vyth ganso?
A wra lew yowynk kria dhiworth y fow
mar ny gemmeras ev travyth?
5A wra edhen koedha yn maglenn war an leur
pan nag eus boes ynni?
A wra antell lemmel a-dhiwar an leur
heb kachya travyth?
6Eus korn hwythys yn sita,
heb bos an bobel ownek?
A vydh anfeusi yn sita,
marnas an Arloedh a'n gwrug?
7Yredi ny wra an Arloedh Duw travyth
heb diskudha y dowl kudh
dh'y servysi an brofoesi.
8An lew re usas:
piw ny'n jevydh own?
An Arloedh Duw re gewsis:
piw ny brofoes?
Tenkys Samaria
9Diskleryewgh dhe'n palesyow yn Ashdod,
ha dhe'n palesyow yn pow Ejyp,
ha leverewgh: ‘Omguntellewgh war venydhyow Samaria,
ha gwelewgh an lies arwask eus ynni,
ha'n dus arweskys a-berth ynni.’
10Ny wodhons fara ewn, yn-medh an Arloedh,
an re a guntell yn aga falesyow preydh aga garowder ha ladrans.
11Rakhenna yndellma y lever an Arloedh Duw:
Eskar a omsett a-dro dhe'n vro
ha dri dhe'n leur agas nerth,
ha pyllys vydh agas palesyow.
12Yndellma y lever an Arloedh: Dell dhelirv an bugel mes a anow an lew diw arr po tamm skovarn, yn kettella delivrys vydh mebyon Ysrael eus trigys yn Samaria, gans tamm a weli ha gans gweli-dydh a dhamask.
13Klewewgh ha testewgh erbynn chi Yakob,
yn-medh an Arloedh Duw, Duw an luyow,
14rag y'n jydh may kessydhyav Ysrael drefenn y gammweythresow,
my a gessydh alteryow Bethel,
ha treghys vydh kern an alter
ha koedha a wrons dhe'n leur.
15Brewi a wrav an gwavos war-barth gans an havos,
ha mos dhe goll a wra an chiow a dhans olifans,
ha distruys vydh an chiow bras,
yn-medh an Arloedh.